Protestuesit në Paris kanë spërkatur me bojë të kuqe ndërtesën e Ministrisë së Shëndetësisë për të “simbolizuar ata që humbën jetën” nga Covid-19 dhe për të nxjerrë në pah kushtet e dobëta për punonjësit e kujdesit shëndetësor.
Shumë prej demonstruesve ishin pjesë e Shoqatës për Taksimin e Transaksioneve Financiare dhe Veprimit të Qytetarëve (Attac), një grup aktivistësh i krahut të majtë. Rreth 30 demonstrues nga Attac dhe Inter-Urgjencat, një shoqatë e stafit paramedik, morën pjesë në protestë. Të dy shoqatat kanë kritikuar trajtimin që qeveria franceze u ka bërë punonjësve të kujdesit shëndetësor.
“Ne jemi këtu për të treguar mbështetjen tonë për stafin e kujdesit shëndetësor, të cilët kanë qenë në radhë të parë gjatë krizës sanitare, por veçanërisht për të kërkuar që ata më në fund të kenë mjetet e nevojshme për të punuar dhe për t’u kujdesur me vendosmëri për ne,” tha në një deklaratë Aurélie Trouvé, zëdhënëse për Attac France.
“Personeli i kujdesit shëndetësor meriton më shumë sesa medalje dhe gaz lotsjellës,” shtoi Trouvé, duke iu referuar përplasjeve më 16 qershor kur oficerët e policisë qëlluan me gaz lotsjellës punonjësit e kujdesit shëndetësor që protestuan në Paris. Demonstrata ishte e para nga punonjësit e shëndetësisë që nga lehtësimi i masave të bllokimit në Francë.
“Përballë kësaj pavendosmërie, stafi i kujdesit shëndetësor ka vendosur të tregojë fytyrën e vërtetë të qeverisë dhe ministrave të saj duke u ofruar atyre medaljen e përbuzjes,” thuhej në deklaratën e Attac.
