Nisi në Tiranë samiti “Ukrainë – Europa Juglindore”, pas mbërritjes së pjesëmarrësve, të cilët u pritën në tapetin e kuq para Pallatit të Kongreseve nga kryeministri Edi Rama dhe presidenti i Ukrainës Volodymit Zelensky, si bashkëorganizatorë të samitit.
I pari që ka folur ka qenë kryeministri Rama, i cili tha se lufta nisi nga një ëndërr e vjetër perandorake, ku presidenti rus Putin synonte fshirjen e Ukrainës nga harta.
Më parë Rama dhe Zelensky nënshkruan edhe Traktatin e Miqësisë dhe Bashkëpunimit mes Shqipërisë dhe Ukrainës,
Përditësim minutë pas minute:
12:00/ Nis Samiti për Ukrainën, Rama: Lufta nisi nga një ëndërr e vjetër perandorake. Putin donte të fshinte Ukrainën nga harta, por…
Kryeministri Edi Rama, si i zoti i shtëpisë, ka hapur sot punimet në samitin për Ukrainën që po mbahet në Tiranë. Kreu i qeverisë shqiptare foli për një të ardhme të përbashkët, ku fokusi është te paqja.
Ai tha se lufta si një ëndërr e vjetër perandorake dhe se Putin donte që të fshihte Ukrainën nga harta.
Rama: Jemi thellësisht të nderuar që Zelensky bëri udhëtimin në Tiranë mes punës dhe qëndresës ndaj luftës në Ukrainë. Kjo është një luftë që as Ukraina e as bashkësia e Kombeve nuk e zgjodhën, një katastrofë e ngjizur nga një ëndërr e vjetër e një ëndrre perandorake. Prania juaj këtu, kujtesë që ai nuk ia ka dalë, nuk ka shtypur vullnetin e popullit ukrainas të jenë të lirë. Putini donte të fshinte Ukrainën nga harta brenda disa ditësh, por sot ajo është më e pranishme se kurrë.
11:50/ Bashkëdrejtues Rama dhe Zelensky, nis në Tiranë Samiti për Ukrainën
11:23/ Samiti për Ukrainën, Vuçiç mbërrin në Pallatin e Kongreseve, pritet nga Rama dhe Zelensky
Presidenti i Serbisë Aleksandër Vuçiç ka mbërritur në Pallatin e Kongreseve, ku është pritur nga kryeministri Edi Rama dhe presidenti i Ukrainës Volodymir Zelensky.
Serbia është i vetmi shtet në rajoni që nuk pranon të vendosë sanksione për Rusinë, e cila prej dy vitesh ka pushtuar Ukrainën.
“Ne kemi disa propozime për deklaratën, do të shohim… E vetmja gjë që mund të them është se do t’i përmbahem parimeve të miratuara nga Këshilli i Sigurisë Kombëtare i Republikës së Serbisë dy vjet më parë”, u tha Vuçiç gazetarëve
11:13/“Do të jemi këtu deri në fitoren e Ukrainës”, Vjosa Osmani para Samitit në Tiranë: Do të kërkojmë njohjen e Kosovës, përballje me Vuçiç për…
Presidentja e Kosovës Vjosa Osmani ka mbërritur në Tiranë për zhvillimin e Samitit për Ukrainën.
Osmani është takuar me Presidentin ukrainas Zelensky dhe kryeministrin Rama, ndërsa ka thënë për mediat se në samit do të shprehet mbështetja për Ukrainën duke folur për hapa konkretë.
Ajo u shpreh se do të kërkojë edhe njohjen e Kosovës nga Ukraina, por me mirëkuptimin se Ukraina është në një situatë lufte dhe se njohja do të vijë pas fitores së Kievit.
Po ashtu, e pyetur mbi ballafaqimin e mundshëm me delegacionin serb apo presidentin Vuçiç, ajo tha se gjithmonë ka pasur ballafaqime me palën serbe.
Osmani: Ka shumë rëndësi sepse do kemi mundësi që si aleatë në vlera të japim gjithë mbështetjen tonë për Ukrainën siç kemi bërë nga dita e parë e agresionit të paprovokuar rus. Këtë do ta bëjmë edhe më tej. Sot në samit do të flasim për hapa konkretë.
A do të kërkoni njohjen e Kosovës nga Ukraina?
Osmani: Këto janë çështje bilaterale, do ta bëjmë një kërkesë të tillë me mirëkuptimin e plotë se Ukrainë është në situatë lufte dhe jam e bindur se ai moment do të vijë me fitoren e Ukrainës.
A do të ballafaqoheni me presidentin serb?
Osmani: Gjithmonë kemi ballafaqime me ta.
