Partia irlandezo-veriore DUP, euroskeptike dhe ultrakonservatore ka vetëm 10 deputetë, megjithatë mbështetja e saj është thelbësore për kryeministrin Boris Johnson, i cili nuk ka shumicën në parlament.
Partia unioniste e Irlandës së Veriut, DUP, aleate e konservatorëve të Boris Johnson-it në Parlamentin britanik, ritheksoi sot kundërshtimin e saj ndaj marrëveshjes së negociuar mes Londrës dhe Bashkimit Europian, duke rritur së tepërmi pasigurinë e miratimit të saj nga ana e deputetëve.
“Kundërshtimi ndaj këtij kompromisi në përgatitje e sipër, mbetet pozicioni ynë”, tha një burim në partinë DUP.
Kryeministri britanik, Boris Johnson njoftoi sot se kishte arritur një marrëveshje të shkëlqyer për Brexit me Bashkimin Europian, vetëm disa orë nga takimi i BE-së për të vulosur fatin e largimit të Britanisë së Madhe nga BE pas dy javësh.
“Ne kemi një marrëveshje të shkëlqyeshme të re që rifiton kontrollin”, tha në Twitter udhëheqësi konservator.
Ai u bëri thirrje deputetëve britanikë që të miratojnë marrëveshjen në një seancë të jashtëzakonshme parlamentare të shtunën e ardhshme./ATSH/
