Administratori i kompanisë importuese të 18 tonëve mish pule me bakterin e salmonelës është ndaluar nga policia.
Arben Goxha ishte shpallur në kërkim për importimin e disa tonëve mish pule që kishte rezultuar i infektuar me bakterin e salmonelës. Megjithatë, në njoftimin e policisë thuhet se “pas konsultimit me prokurorin, u vendos procedimi në gjendje të lirë i këtij shtetasi”.
“Njoftimi parë është për Arben Goxha, i cili ishte shpallur në kërkim për importimin e disa tonëve mish pule që kishte rezultuar i infektuar me bakterin e salmonelës.
Specialistët e Seksionit për Hetimin e Krimit Ekonomik dhe Financiar ndaluan shtetasin A. G., 50 vjeç, të shpallur në kërkim për veprën penale “Importimi, prodhimi, shitja dhe ruajtja e ushqimeve të rrezikshme, për shëndetin ose jetën e njerëzve“. Pas konsultimit me prokurorin, u vendos procedimi në gjendje të lirë i këtij shtetasi”, njofton policia.
Përveç hedhjes në treg të produktit të infektuar, ai dyshohet se ka paraqitur edhe disa fatura fiktive, duke vështirësuar gjurmimin e mishit të dëmshëm për konsumatorët. Policia ka proceduar penalisht edhe vëllanë e Arben Goxhës, po ashtu administrator i një kompanie të përpunimit të mishit, për dyshimin e importimit të produkteve ushqimore që kanë në përmbajtje bakterin e salmonelës.
Në hetim janë marrë edhe 3 inspektorë të AKU-së, Gëzim Hushi, Sada Lufta, Aldo Sinjari. Ata akuzohen për “shpërdorim të detyrës”, pasi në cilësinë e inspektorëve të AKU me veprimet dhe mosveprimet e tyre kanë lejuar futjen në treg të këtyre produkteve.
Përmes një reagimi zyrtar, AKU njoftoi se pas analizave të bëra në ISUV më 21 mars ishte identifikuar bakteri salmonelë në ngarkesën e ardhur nga Brazili dhe se po koordinonte gjurmimin dhe bllokimin, por nuk saktësoi sasinë e hedhur, apo sasinë e identifikuar dhe bllokuar, nëse ka të tillë.
