Ish-ylli i Juventusit, Moise Kean u desh të largohej nga loja me barelë në pjesën e dytë të ndeshjes mes Hellas Veronës dhe Fiorentinës pasditen e së dielës.
Kjo për shkak të një goditje të fortë që mori në fytyrë nga një lojtar kundërshtar, duke bërë që ai të përfundojë pa ndjenja.
Pati një përplasje të tre lojtarëve në atë moment – Moise Kean, Pawel Dawidowicz dhe Diego Coppola, por më se keqi e pësoi Kean.
Kean mori një goditje të madhe pak centimetra mbi syrin e tij dhe loja u ndërpre menjëherë për të marrë tretman mjekësor nga stafi i Fiorentinës.
Stafi mjekësor ishte në gjendje që t’i rikthejë vetëdijen reprezentuesit italian dhe pak minuta më vonë ai u fut në fushë me një fashë të zezë të mbështjellë kokës.
Sidoqoftë, pas inkuadrimit të tij në lojë, Kean pati sërish probleme pasi vetëdija i humbi sërish dhe nuk lëvizi në fushë për disa momente duke shkaktuar frikë dhe panik në shkallët e stadiumit.
Lojtarët e të dyja skuadrave reaguan menjëherë duke kërkuar barelën ose ambulancën që të futet në fushë.
Sipas një njoftimi zyrtar që u bë më vonë nga Fiorentina, ishte konfirmuar se Kean është diagnostifikuar me traumë të kokës dhe është dërguar në spitalin lokal për teste të mëtejshme./Telegrafi/
