Kryetari i Partisë Demokratike te Kosovës Memli Krasniqi i bëri thirrje qeverisë të plotësojë urgjentisht kushtet që policia të zbatojë rendin dhe ligjin në pjesën veriore të Kosovës.
Memli Krasniqi tha se është koha për rikthim të normalitetit edhe në këtë pjesë të shtetit te Kosovës. ”Për atë çfarë mund të bëhet sot, nesër mund të jetë shumë vonë. Kosova nuk e ka këtë komoditet.
Sovraniteti i shtetit tonë po cenohet. E ardhmja jonë po rrezikohet. Kërkohet reagim i menjëhershëm. Hiqni ato barrikada të turpshme dhe dëshmojuni qytetarëve se jeni pranë tyre. Mos e braktisni Kosovën!”, thuhet në reagimin e kreut të PDK në rrjetet sociale.
Ditën e djeshme, Krasniqi kishte komentuar dënimin e ish-komandantit të Ushtrisë Çlirimtare të Kosovës Salih Mustafa në Hagë, duke e cilësuar atë si “të rëndë, që nxitë indinjatë tek secili shqiptar Ushtria Çlirimtare e Kosovës është dhe do të mbetet gjithmonë krenaria jonë kombëtare.
Pjesë qendrore e kësaj historie krenare, të cilën nuk mund ta ndryshojë asnjëherë askush, janë çlirimtarët që po mbahen në Gjykatën Speciale pa të drejtë”.
