“Shqipëria u çlirua për 3 orë”. Kështu e cilëson Sali Berisha protestën e opozitës, që u zhvillua paralelisht në 6 kryqëzimet më të rëndësishme të vendit.
Nga banesa e tij ku po vijon arrestin shtëpiak prej më shumë se 300 ditësh, kreu i Partisë Demokratike, shprehet i kënaqur me qëndresën e qytetarëve dhe thotë se qeveria ka marrë mesazhin e duhur.
“Fitorja më e madhe e ditës së djeshme, është mesazhi i shpresës që ne i dërguam shqiptarëve, që mbrëmë mendja dhe zemra e tyre ishte tek ne. Ky mesazh ishte një dhe vetëm një; Opozita nuk ka frikë nga narkoshteti, por narkoshteti duhet të ketë frikë nga opozita dhe për këtë, falënderimin më të pakufishëm, për gjithë heronjtë, për gjithë guximtarët”.
Pasi Berisha përfundoi mesazhin e tij falwnderues për qytetarët, para kamerës doli numri dy i PD, Flamur Noka.
Nga selia blu, Sekretari i Përgjithshëm i Partisë Demokratike, i cilësoi si të padrejta arrestimet e Policisë dhe i cilëson si të urdhëruara nga Edi Rama.
“Çdo prangë, çdo burgim, çdo arrestim i liderëve dhe mbështetësve të opozitës, është vetëm një hallkë më shumë në zinxhirin e zemërimit popullor, që opozita do ta hedhë në qafë për të tërhequr nga Surreli tek vendi ku 33 vjet më parë hodhën statujën e idhullit tënd”.
Noka shprehet se opozita do të vijojë të protestojë, duke premtuar se në vijim do të tregojnë dhe format e tjera të mosbindjes civile.
