Motra e ngjashme si dy pika uji me Dua Lipën ka ndezur rrjetin, pasi një foto ku ato shfaqen së bashku është bërë virale, duke habitur ndjekësit e këngëtares që s’e dinin se ajo kishte një motër dhe aq më pak që duken kaq njësoj.
Këngëtarja 29-vjeçare postoi më 27 maj në Instagram disa imazhe me motrën e saj më të vogël, Rina Lipa, 24 vjeç, përfshirë një foto ku të dyja shtrihen në peshqirë plazhi, me flokët e kapura dhe veshur me bikini të zeza, duke parë kamerën me kokat që prekin njëra-tjetrën. Fotoja shkaktoi një stuhi komentesh kur u rishpërnda në rrjetin X (ish-Twitter), duke mbledhur pothuajse 20 milionë shikime.
“Ka dy prej tyre?”, “Po janë dy?!”, “Ka… një tjetër?” ishin vetëm disa nga komentet e habitura të fansave që nuk e kishin parë kurrë më parë Rinën, por u tronditën nga ngjashmëria e pabesueshme me Duan. Postime të tjera me foton e tyre morën qindra mijëra shikime dhe komente si “Të dyja janë kaq të bukura”, “Rina dhe Dua janë identike!”, dhe “Çfarë yjesh!”.
Rina Lipa, përveç se motra e një superylli, ka ndërtuar karrierën e saj si balerinë, modele, aktore dhe influencuese në rrjetet sociale, me mbi 844 mijë ndjekës në Instagram. Ajo ka pozuar për marka të mëdha si Versace dhe Miu Miu, ka ecur në pasarelat e Javës së Modës në Milano, dhe së fundmi ka siguruar një rol në filmin Expectations të regjisorit Chris Robert Riegel, bazuar në romanin Great Expectations të Charles Dickens.
Megjithëse i ndajnë pesë vite diferencë, motrat duket se janë shumë të afërta. Në maj, Dua i kushtoi Rinës një postim për ditëlindje, duke e quajtur “shoqja ime e lindur” dhe shkroi: “Nuk e di si jam kaq me fat që të kam në jetën time. Kudo që shkon, ndriçon ambientin dhe njerëzit rreth teje.”
Ndërkohë, Dua Lipa është e fejuar me aktorin Callum Turner, 34 vjeç, me të cilin kurorëzuan romancën e tyre në Krishtlindje.
