Gati se 2/3 e kompanive në Bashkimin Evropian të cilat kërkonin ekspertë të teknologjisë informatike dhe të komunikimit kishin vështirësi të gjenin staf adekuat. Sipas zyrës evropiane të statistikës – Eurostat, 62,8% e kompanive në BE kishin pasur vështirësi në plotësimin e vendeve të lira, ndërsa 9,5% prej tyre raportuan se gjatë vitit 2021 kishin rekrutuar ose ishin përpjekur të rekrutonin specialistë të IT.
Vështirësitë që hasën kompanitë kishin të bënin me mungesën e aplikimeve, mungesën e kualifikimeve dhe përvojës përkatëse, si dhe pritshmërive për paga të larta.
Megjithëse me një mesatare pak më të ulët sesa në BE, edhe kompanitë në vendet e Ballkanit përballen me vështirësi për të punësuar ekspertë të IT-së dhe komunikimit.
Sipas Eurostat-it, 67,8% e kompanive në Shqipëri kishin vështirësi të rekrutonin staf në këtë profesion. Pas Shqipërisë vijne Bosnjë e Hercegovina me 64,5%, Maqedonia e Veriut 58,2%, Serbia 53,9% dhe Mali i Zi 41,6%). TIK është bërë pjesë përbërëse e funksionimit të bizneseve.
Shumica e kompanive synojnë të përshtatin punën me epokën e re digjitale dhe të shfrytëzojnë teknologjitë e reja për mirëmbajtjen dhe menaxhimin e të dhënave, por edhe për të maksimizuar përhapjen dhe fuqizimin e markës.
