Në sesionin e ri parlamentar, fjalën e mori edhe deputeti Myslim Murrizi, i cili tha se më 25 prill, shqiptarët do dinë të ndëshkojnë me votë mashtruesit e 4 viteve në sallën e parlamentit.
“Ajo që është e rëndësishme, është që shqiptarët më 25 prill, do dinë të ndëshkojnë me votë çdop mashtrues të këtyre 4 viteve në këtë sallë. Do dinë të besojnë me votë çdo të ri që nuk është sjellë keq me të”, tha Murrizi
Murrizi u shpreh se ai dhe deputetë të tjerë të opozitës do të garojnë me lista të hapura.
“Unë personalisht së bashku me deputetë të opozitës do garojmë me lista të hapura. Këtë vullnet e pres nga maxhoranca dhe nga ata që kërkojnë atë që kërkojmë dhe ne, 100%e listave të hapura ta sanksionojmë në kodin zgjedhor. T’u rikthehemi rekomandimeve të OSBE-ODIHR. Të jemi të barabartë në kutitë e votimit. Pallavrat dhe dallaveret, zënkat formale me njeri-tjetrin, apo tenderët për makinën e akulloreve mos na i shisni shqiptarëve dhe as neve. Të bëjmë administratë zgjedhore dhe të fuqizojmë kodin penal. Shqiptarët votojnë atë që duan”, tha ai.
Murrizi shpreson se ky sesion do të shërbejë për vazhdimin e reformës në drejtësi, dhe për të bërë një kod zgjedhor sa më të mirë.
”Uroj që ky sesion i fundit të shërbejë për të vazhduar reformën në drejtësi dhe për të përmbyllur me sukses ëndrrën e 85% të shqiptarëve, të bëjmë një kod zgjedhor të mirë e të barabartë, që gara e 25 prillit, të sjellë një rezultat të pranuar nga faktorë dhe aktorë politik shqiptar. Është detyrë e këtij parlamenti, e këtyre deputetëve, pavarësisht stigmatizimeve, përçmimeve, dhe fushatës që ka filluar”, tha Murrizi.