Elon Musk, miliarderi dhe një nga bashkëpunëtorët më të afërt të presidentit amerikan, Donald Trump, beson se, pa ndryshime të menjëhershme dhe dramatike, Shtetet e Bashkuara të Amerikës do ta humbasin luftën e ardhshme.
“Programet amerikane të armëve duhet të rishikohen plotësisht. Strategjia aktuale është të prodhohet një numër i vogël armësh me kosto të lartë për të luftuar në luftërat e së kaluarës. Përveç nëse merren masa të menjëhershme dhe dramatike, Amerika do ta humbasë luftën e ardhshme”, ka shkruar ai në X, duke ngritur shqetësime për të ardhmen e mbrojtjes dhe sigurisë kombëtare të SHBA-së.
Musk, i cili përveç Teslas drejton edhe kompaninë hapësinore SpaceX, ka qenë një zë kritik i fortë ndaj mënyrës se si qeveria amerikane i trajton investimet në mbrojtje dhe zhvillimin teknologjik ushtarak. Ai ka theksuar se përdorimi i teknologjisë së vjetruar dhe mungesa e inovacionit mund ta vendosin Amerikën në disavantazh në një konflikt të ardhshëm.
Miliarderi më herët ka kritikuar edhe programin amerikan të aeroplanëve luftarakë F-35, duke pretenduar se “ndërtuesit e tij janë idiotë” dhe se duhet t’i kushtohet më shumë vëmendje dronëve. Sipas tij, epoka e aeroplanëve të pilotuar po i lë vendin mjeteve ajrore pa pilot, të cilat janë më fleksibile, më pak të kushtueshme dhe më efektive në luftë moderne.
Megjithatë, ekspertët e teknologjisë ushtarake i kanë hedhur poshtë këto pretendime, duke argumentuar se F-35 mbetet një nga aeroplanët më të avancuar në botë dhe se përdorimi i dronëve nuk mund ta zëvendësojë plotësisht atë. Sipas tyre, lufta ajrore kërkon një ekuilibër midis teknologjisë së pilotuar dhe asaj të automatizuar, ndërsa zhvillimi i ardhshëm duhet të fokusohet në bashkëpunimin midis tyre.
Që nga ardhja në pushtet e Trumpit, Musk ka marrë një rol shumë të rëndësishëm brenda administratës së tij, ku është angazhuar edhe për mbylljen e USAID-it dhe uljen e shpenzimeve shtetërore. Ai ka qenë një nga mbështetësit më të zëshëm të reduktimit të burokracisë dhe rritjes së efikasitetit në sektorin publik, duke theksuar se qeveria amerikane duhet të fokusohet më shumë në inovacion dhe përparësi strategjike sesa në programe që ai i sheh si të panevojshme.
Në vitet e fundit, Musk është bërë një figurë gjithnjë e më e fuqishme në politikën amerikane, duke ndikuar në vendimmarrjen në fusha të ndryshme, nga teknologjia dhe ekonomia deri te politika e jashtme dhe mbrojtja. Me qëndrimet shpesh kundërthënëse, ai vazhdon të ndezë debate mbi të ardhmen e Amerikës dhe rolin e saj në arenën globale.
