Nga Blerina Ruka
Në periferi të qytetit të Montrealit, ndodhet një vend i veçantë, një kujtim i thellë i një kohe të errët në historinë e njerëzimit. Hapja e dyerve të Muzeut të Holokaustit në Montreal më dha një mundësi të rrallë për të eksploruar një kapitull të tmerrshëm të historisë së botës.
Në një vizitë që më la pa frymë, pata mundësinë të njihesha me vuajtjet dhe shpirtin e pabesueshëm të atyre që pësuan në këtë periudhë tragjike.
Me një dizajn modern dhe minimalist, ngjyra gri rritet duke reflektuar seriozitetin e temës së trajtuar, sallat e muzeut janë ambiente të heshtura, galeri tematike e dhomat përkujtimi; janë të gjitha hapësira të qeta në respekt të të gjithë listës së gjatë të emrave që rreshton një monitor në mur.
Hapi i parë brenda muzeut më përshëndeti me një atmosferë të zymtë. Sallat e ekspozitave me pamjet dhe objektet autentike të periudhës së Holokaustit u fiksuan në sytë e mi.
Fotografitë e viktimave, kopjet autentike të ditareve dhe sendet e humbura që qëndrojnë si dëshmi e një kohe të errët më prekin në mënyrë të pashpjegueshme. Sytë e tyre të kripur rrëfejnë vuajtjen, por gjithashtu forcën dhe reziliencën që i lejuan të mbijetonin.
Rrëfimet të mbushura me frikë, vuajtje dhe humbjen më sollën një perspektivë të re mbi jetën dhe përkushtimin ndaj njeriut. Ndjenja e respektit dhe trishtimit më ngjitet në zemër, ndërsa hyn në këtë ndërtesë të pathyeshme, e cila mban një barrë historike kaq të rëndë. Me një shpirt kureshtar, përgatitem për një vizitë të thellë në botën e kujtesës së vuajtjeve të papara.
Ashtu si shumë të tjerë, jam përpjekur të imagjinoj përvojën e tyre, por të përjetosh këto rrëfime të thella dhe të prekshme më bën të ndihem e pafuqishme por edhe e frymëzuar në të njëjtën kohë. Secila histori sjell me vete një mësim të jashtëzakonshëm për durimin, ndarjen dhe respektin ndaj të tjerëve. Përkundrazi, si mundet njëkohësisht të jesh njeri i përkushtuar për jetën dhe të dëshirosh vdekjen për t’i ikur vuajtjes së pandalshme?
Përpos gjithë ngarkesës emocionale, lë shije edhe prezantimin i mrekullueshëm i informacionit, tekstet, fotot, objektet autentike dhe dëshmitë personale janë prezantuar me kujdes dhe profesionalizëm për të ndihmuar një kuptim më të thelluar.
Vizita në Muzeun e Holokaustit në Montreal është një përvojë emocionuese dhe edukative, e përsosur për të zgjeruar njohuritë, për të kuptuar thellësinë e një tragjedie historike dhe për të përjetuar një moment të rëndësishëm në historinë e njerëzimit të shekullit të 20-të. Ai nuk është vetëm një institucion që tregon historinë e një periudhe të errët, por një ftesë për të reflektuar mbi vlerat dhe përgjegjësinë tonë si njerëz.
