Të mbetur pa zgjidhje, naftëtarët e Ballshit u janë rikthyer sërish protestave sot. Të nxitur edhe nga protesta e një ditë më e parë e mjekëve dhe reagimi i menjëhershëm i autoriteteve, ata vvazhdojnë të pyesin se pse nuk i dëgjon njeri problemet e tyre.
Përballë kësaj situate ata po e shqyrtojnë edhe mundësinë e grevës së urisë.
“Të shkojmë tek sfera që ndodhet brenda në uzinë. Të shikojmë do të vijë shteti apo jo. 100 mjekë u mblodhën dhe e gjetën gjuhën, ne jemi me qindra familje dhe nuk po na zgjidh njeri. Të shkojmë të gjithë brenda. Të futemi në grevë urie. Vetëm greva e urisë mund të sjellë reagimin” tha një naftëtar.
Ndërsa Sokol Dautaj, kreu i Sindikatës, u shpreh: “Nuk kemi gjetur zgjidhje. Jemi në mes të katër rrugëve. Shkuam në Tiranë për të biseduar dhe nuk na priti njeri. Do ndjekim çdo rrugë ligjore pasi tani shoqatën e kemi të ligjëruar edhe në gjykatë. Nuk kemi asnjë përgjigje as për pagat dhe as për fillimin e punës”.
Likujdimi i pagave të prapambetura dhe rifillimi i punës në uzinë, janë dy kërkesat kryesore të naftëtarëve që pak ditë më parë e zhvendosën protestën në Tiranë por u shpërndanë me pretekstin e shkeljes së protokollit të masave për Covid që ndalon grumbullimet.
