NASA ka publikuar një tjetër audio-incizim të roverit “Perseverance” – i cili ka qenë në një mision në Mars për një muaj – gati një muaj pasi kemi marrë videon dhe tingullin e parë nga ky planet.
Është një tingull nga Planeti i Kuq plot gumëzhitje, të cilin roveri e prodhon me rrotat e tij ndërsa lëviz dhe eksploron sipërfaqen e Marsit.
“E dëgjoni këtë? Ky është tingulli që krijohet kur unë vozis mbi shkëmbinjtë Marsian. Kjo është hera e parë që kapim tinguj ndërsa lëvizim në Mars”, shkruhet në një postim në Twitter, në një llogari që informon me shaka publikun për veprimet e roverit nga perspektiva e tij.
Roveri “Perseverance” u ul në Mars më 18 shkurt dhe misioni i tij është të kërkojë gjurmë të jetës mikrobiologjike në zonën e Liqenit Krater, sepse shkencëtarët besojnë se jeta ishte e mundur në Planetin e Kuq miliona vjet më parë.
