Pas përfundimit të mbledhjes së kryesisë së Partisë Demokratike (PD), ish-kandidati për kreun e kësaj force, Fatbardh Kadilli, deklaroi se gjatë mbledhjes u diskutuan edhe propozimet e tij për ndryshimet në statut, por janë votuar vetëm ato të propozuara nga kryetari.
“U miratuan vetëm ndryshimet e propozuara nga kryetari. Nuk hodhi një hap të rëndësishëm që unë besoj se e presin, në radhë të parë demokratët, por edhe gjithë shqiptarët. Jemi ende në kohë për të shfrytëzuar Kuvendin Kombëtar si një mundësi për të hapur një proces kuvendimi me demokratët e shqiptarët, për të denoncuar të keqen, për ta bërë këtë parti të pasur, të hapur, konkurruese dhe fituese. Ndryshimet e propozuara nga unë që burojnë nga manifesti politik u diskutuan, por u gjykuan të parakohshme”, tha Kadilli.
Sipas tij, me kryetarin Basha ndajmë koncepte të ndryshme për rolin e kryetarit të partisë.
“Uroj që Kuvendi Kombëtar të kuvendojë që të ndryshojmë veten tonë, të jemi më të hapur për të mundur Edi Ramën, për të larguar të keqen që kanë përballë shqiptarët”, tha Kadilli./ATSH/