Policia kufitare në doganën e Morinës ka arrestuar një shtetas serb, i cili ishte shpallur në kërkim ndërkombëtar nga Gjermania.
Në pranga është vënë shtetasi serb G. S., 55 vjeç, i cili po tentonte të hynte në territorin e Republikës së Shqipërisë.
“Nga verifikimet e kryera dhe nga informacioni i shkëmbyer me partnerët gjermanë, nëpërmjet Interpol Tiranës, rezultoi se ai ishte i shpallur në kërkim ndërkombëtar, me masë sigurie “Arrest në burg” nga Gjykata e Mainz, për evazion fiskal dhe përfitim të kundërligjshëm të pagave/shpërblimeve të të tjerëve.” – thuhet në njoftimin e autoriteteve.
Policia thotë se Interpol Tirana, në bashkëpunim me homologët në Gjermani, po vijon procedurat për ekstradimin e 55-vjeçarit.
