Intervista tre-orëshe e kandidatit republikan për president Donald Trump me Joe Rogan është publikuar së fundmi.
Në intervistë, ish-presidenti diskuton gjithçka që nga “gabimi më i madh” i qëndrimit të tij në Shtëpinë e Bardhë, biseda me liderin e Koresë së Veriut, e deri mendimet e tij mbi jetën jashtokësore.
Dy vjet më parë Rogan e përshkroi Trumpin si “një kërcënim ekzistencial për demokracinë” dhe refuzoi ta kishte atë në emisionin e tij.
Por dyshja u dukën miqësor gjatë intervistës teksa biseduan për interesin e tyre të përbashkët në Ultimate Fighting Championship dhe miq të përbashkët si Elon Musk.
Trump për ‘gabimin e tij më të madh’
“Zgjodha disa njerëz që nuk duhej t’i kisha zgjedhur”, tha Trump kur u pyet për “gabimin më të madh” të presidencës së tij 2017-2021.
“Njerëz të këqij, të pabesë”, tha ai duke iu referuar neokonservatorëve, politikëbërësve që mbështesin një politikë të jashtme ndërhyrëse të SHBA-së.
“Një djalë si Kelly, i cili ishte një ngacmues, një person i dobët”, shtoi Trump, duke përmendur ish-shefin e tij të stafit të Shtëpisë së Bardhë, John Kelly, i cili e përshkroi ish-shefin e tij si “fashist”.
Përveç Kellyt, Trump dha mendimin e tij edhe për ish-këshilltarin e tij të Sigurisë Kombëtare të SHBA-së, John Bolton.
“Ai ishte një idiot, por i dobishëm ndonjëherë”, u shpreh ish-presidenti.
Biseda me liderin e Koresë së Veriut
Trump tha se ai e njohu “shumë mirë” liderin e Koresë së Veriut, Kim Jong-un, pavarësisht nga disa përplasje midis të dyve, fillimisht kur Trump i tha: “Do të digjesh në ferr”.
Gjithashtu, republikani tha se kërkoi nga lideri i Koresë së Veriut të ndalonte ndërtimin e rezervave të tij “të konsiderueshme” të armëve.
“A bëni ndonjëherë ndonjë gjë tjetër? Pse nuk e merr me qetësi? Shkoni në plazh, pushoni”, iu kishte drejtuar Trump liderit të Koresë së Veriut.
Trump gjithashtu argumentoi se Rusia nuk do ta kishte pushtuar kurrë Ukrainën nëse ai do të kishte qenë president.
“Unë i thashë Vladimir, ti nuk do të hysh brenda. Unë flisja me të gjatë gjithë kohës. Nuk mund t’ju them atë që i thashë, sepse mendoj se do të ishte e papërshtatshme, por një ditë ai do t’ju tregojë, por nuk do të kishte hyrë kurrë”.
Sipas Trump, Putini ka ndërhyrë ushtarakisht në Ukrainë sepse “ai nuk e respekton Bidenin”.
Zgjedhjet e vitit 2020
I pyetur për prova për të mbështetur pretendimet e tij të rreme se presidencialja e vitit 2020 iu vodh nga mashtrimi masiv i votuesve, Trump i tha Roganit: “Do ta bëjmë një herë tjetër”.
“Ato zgjedhje ishin aq të shtrembëra, ishin më të shtrembërat”.
Trump pretendoi parregullsi me fletëvotimet në Wisconsin dhe se demokratët “përdorën COVID-in për të mashtruar”.
“Unë humba, si, nuk humba”, vazhdoi ai.
Ndryshe, gjatë intervistës së gjatë Trump sulmoi kundërshtarët e tij politikë dhe lavdëroi aleatët e tij.
Ai e quajti rivalen zëvendëspresidenten Kamala Harris, një “person me IQ shumë të ulët” dhe e përshkroi Gavin Newsom të Kalifornisë si “një nga guvernatorët më të këqij në botë”, ndërsa Elon Musk e përshkroi si “djali më i madh”.
Ai tha se është “plotësisht” i përkushtuar për të sjellë Robert F Kennedy Jr në një administratë të re potenciale të Trump.
Mbi jetën jashtëtokësore
Trump tha se ai nuk e kishte përjashtuar mundësinë e ekzistencës së jetës në hapësirë.
“Nuk ka asnjë arsye për të mos menduar se Marsi dhe të gjithë këta planetë nuk kanë jetë”, tha ai duke iu referuar diskutimeve që kishte pasur me pilotët e aeroplanëve që kishin parë gjëra “shumë të çuditshme” në qiell.
“Epo, Mars – ne kemi pasur sonda atje, dhe rovera, dhe nuk mendoj se ka jetë atje”, tha Rogan.
“Ndoshta është jeta për të cilën ne nuk dimë”, iu kundërpërgjigj Trump.
Kandidati republikan ka qenë nën presion nga demokratët për të nxjerrë të dhënat e tij mjekësore pasi Harris publikoi të dhënat e saj në fillim të këtij muaji, të cilat arritën në përfundimin se ajo kishte “shëndet të shkëlqyer” dhe është e përshtatshme për presidencën.
Trump nuk e trajtoi temën drejtpërdrejt, por i tha Roganit se mjekët e kishin përshkruar aftësinë e tij për të vrapuar si “të pabesueshme”.
