Ditën e djeshme në spitalin e Peshkopisë janë paraqitur disa persona me simptoma helmimi dyshohet nga uji i pijshëm.
Po ashtu edhe në pediatri kishte 10 raste me të njëjtat simptoma, dhimbje barku dhe të vjella. Zona nga ato vijnë furnizohet me ujë të pijshëm nga ujësjellësi i Saponikës, ndaj dyshimet kryesisht janë tek kontaminimi i ujit të pijshëm.
Ndërkohë, Njësia Vendore e Kujdesit Shëndetësor ka marrë mostrat e ujit dhe nga analizat e para, ato mikrobike, kanë dalë pa ngarkesa.
Ditën e sotme pritet të vijë përgjigjja e analizave bakterologjike të çuara për analizim në laboratorin kombëtar në Tiranë.
Që nga dita e djeshme institucionet kanë njoftuar banorët e Njësive Administrative Kastriot, Fushë Çidhën, Arras, dhe një pjesë e fshatrave të Njësisë Tomin që të mos e konsumojnë ujin, ose ta ziejnë atë para përdorimit.
