Në Shqipëri dhe Kosovë fëmija i parë i vitit 2023 është vajzë
Në QKUK në minutat e parë të vitit 2023 ka ardhur në jetë një vajzë.
Mjeku në Klinikën e Gjinekologjisë pranë Qendrës Klinike universitare të Kosovës (QKUK) Naser Rafuna konfirmoi lajmin për KosovaPress.
Rafuna deklaroi se si nëna ashtu edhe fëmija janë mirë me shëndet. Nëna e pacientes është Elona Rrustemi nga Drenasi.
‘Para pak minutash lindi foshnja e parë në klinikën tonë, e gjinisë femër, pacientja është Elona Rrustemi nga Drenasi, ka lindjen e dytë, ka lind një fëmijë të shëndoshë nëpër rrugë natyre të lindjes, gjendja e nënës dhe fëmijës është shumë e mirë’, tha ai.
Ndërsa në Shqipëri, Ministrja e Shëndetësisë, Ogerta Manastirliu ndau sot foto nga fëmijët e parë që lindën këtë vit.
‘Mirë se erdhët Promisa dhe Orjol. Është vajzë fëmija i parë i vitit 2023, që lindi shëndosh e mirë në maternitetin ‘Mbretëresha Geraldinë’, me të trokitur ora 12:00’, u shpreh Manastirliu.
‘Një minutë pas ndërrimit të viteve erdhi në jetë edhe një djalë i shëndetshëm, bebi i parë që lindi në maternitetin ‘Koço Gliozheni’. Jetë të gjatë e paçi këmbën e mbarë’, theksoi Manastirliu.
