Grupi parlamentar i drejtuar nga Gazment Bardhi synon që në shtator të unifikojë qëndrimin opozitar në parlament. Çfarë do të thotë kjo? Deputeti Bledion Nallbati shpjegoi për emisionin “Pa Cencurë” lëvizjen e pritshme të shtatorit.
“Të ndarë nuk fiton askush. As zoti Berisha me grupin e tij, as ne me grupimin tonë, as pjesa që po krijohet tani me Bashën jo e jo. Prandaj, nga shtatori ne duhet të unifikojmë grupin parlamentar të dalë nga zgjedhjet e 25 prillit.
Fokusi ynë duhet të jetë qeveria dhe jo vetja. Lufta mes demokratëve duhet të ndalet. Duhet të ketë rakordim të aksionit opozitar në raport me qeverinë, pavarësisht se disa parime na ndajnë edhe brenda nesh, por nuk na ndan qëllimi për luftë opozitare kundër qeverisë“, tha Bledion Nallbati, i cili ka një thirrje për Sali Berishën dhe Lulzim Bashën për mënyrën sesi duhet të zgjidhet konflikti në PD.
“Ka zgjidhje. Kjo vjen kur njerëzit që drejtojnë, dalin mbi interesin e vet. Zoti Berisha dhe zoti Basha duhet të dalin mbi interesat e tyre personale.“- u shpreh deputeti demokrat Bledion Nallbati në emisionin “Pa Censurë” në RTSH, duke i qendruar besimit se PD i duhet një lëvizje për unifikimin e saj.
