Pandemia e Covid 19 është shkaku kryesor përse Bashkimi Evropian shënoi shifrën më të lartë të vdekjeve vjetore gjatë vitit të shkuar.
Që nga viti 1961, kur u mbajtën statistikat e popullsisë për gjithë unionin, 2020-ta ishte më vdekjeprurësi.
Sipas Eurostat, humbjet e jetëve shënuan një rënie të lehtë të numrit të popullsisë europiane.
Vendet e BE’së regjistruan gjatë vitit 2020, 534.000 vdekje më shumë se në 2019 (+ 11%).
Vdekjet nga 4.7 milionë u rritën në 5.2 milionë, një numër që “pasqyron ndikimin e pandemisë”, thotë Eurostat.
Numri i vdekjeve u rrit në të gjitha vendet e BE’së gjatë kësaj periudhe, por kryesisht në Itali, Spanjë dhe Poloni, sipas të dhënave të botuara nga Zyra Evropiane e Statistikave.
