Në shumë vende, ekziston kjo ide fëminore se nëse dikush do të hapte një gropë dhe do të kalonte nëpër qendër të Tokës, do të përfundonte në një pikë të caktuar.
Në SHBA shpesh thonë “në Kinë”, në Mbretërinë e Bashkuar se mund të arrijnë “në Australi”, ndërsa në Australi thonë “diku në Evropë”.
Në fakt, e vërteta është krejtësisht ndryshe. Një hartë interaktive zbulon pikën e saktë në sipërfaqen e Tokës që është diametralisht e kundërt me çdo vendndodhje.
Edhe pse skenari është qartësisht teorik, pasi nxehtësia dhe presioni brenda planetit e bëjnë të pamundur, harta tregon “antipodin” e secilës pikë.
Për Mbretërinë e Bashkuar, antipodet nuk janë Australia, por oqeani në juglindje të Zelandës së Re. Në fakt, pjesa më e madhe e Evropës ka antipode që bien në zona detare. Një nga përjashtimet e pakta është një pjesë e Spanjës qendrore, ku ajo mbërrin në kontinentin e Zelandës së Re.
Dhe për SHBA-në, destinacioni popullor i… Kinës nuk vlen. Shumica e pikave dalin në Oqeanin Indian ose Jugor. Një nga shembujt më të mirë që të çon afër tokës ka të bëjë me një zonë pranë Fort McMurray në Kanada, e cila korrespondon gjeografikisht afër Ishujve të izoluar Heard dhe McDonald.
Harta tregon gjithashtu çifte të rralla qytetesh të mëdha që janë pothuajse saktësisht përballë njëri-tjetrit në planet.
Ato janë:
• Christchurch (Zelanda e Re) – A Coruña (Spanjë)
• Hong Kong – La Quiaca (Argjentinë)
• Ulan-Ude (Rusi) – Puerto Natales (Kili)
• Padang (Indonezi) – Esmeraldas (Ekuador)
