Presidenti amerikan Donald Trump ka nënshkruar një urdhër ekzekutiv që rikthen dënimin me vdekje për rastet e vrasjes në Uashington, DC, duke e konsideruar këtë si një hap vendimtar për uljen e dhunës në kryeqytet.
Sipas urdhrit, Prokurorja e Përgjithshme e SHBA-së Pamela Bondi dhe Prokurorja e SHBA-së për Distriktin e Kolumbias Jeanine Pirro janë të udhëzuara që të zbatojnë plotësisht dënimin me vdekje në rastet kur provat e mbështesin këtë masë.
“Nëse vret dikë, ose nëse vret një oficer policie – dënim me vdekje. Dhe shpresoj që nuk do të kemi më raste të tilla”, deklaroi Trump gjatë ceremonisë së nënshkrimit në Shtëpinë e Bardhë, ku ishte i shoqëruar nga Zëvendëspresidenti JD Vance, Drejtori i FBI-së Kash Patel dhe zyrtarë të tjerë të lartë.
Sekretari i Stafit të Shtëpisë së Bardhë, Will Scharf, e cilësoi masën si “një nga mjetet më të fuqishme parandaluese kundër krimit të dhunshëm”, duke theksuar se është pjesë e përpjekjeve për ta bërë kryeqytetin amerikan më të sigurt.
Vendimi vjen pas masave të mëdha të Trump kundër kriminalitetit në DC. Në gusht, ai shpalli emergjencë të sigurisë publike duke vendosur policinë e qytetit nën kontroll federal dhe duke dërguar qindra trupa të Gardës Kombëtare për të mbështetur rendin dhe sigurinë.
