Analisti Xhelal Neziri ka bërë një vlerësim të situatës politike të krijuar në vend, formimin e koalcioneve dhe prognozën për rezultatin përfundimtar në zgjedhjet parlamentare të 12 prillit.
Në një intervistë për Gazeta Express, Neziri vlerëson koalicionin e arritur në mes ASH-së dhe Alternativës duke e cilësuar si të nevojshëm këtë veprim në aspektin e ruajtes së votës shqiptare në vend: “. Është mirë që ASH dhe AA kanë bërë një koalicion, me të cilin pritet ta sfidojnë seriozisht BDI-në në zgjedhjet e 12 prillit. Një konkurrencë e fuqishme politike te shqiptarët do të prodhojë zgjidhje dobiprurëse programore dhe kadrovike, me të cilat do të aktivizohen më shumë votues që të japin mendimin e tyre nëpërmjet votës në ditën e zgjedhjeve. Rigrupimi dhe koalicionimi kanë qenë të nevojshme që më herët sepse vetëm një garë e njëmendtë midis dy ose maksimum tre grupimeve politike do të prodhonte rezultate të dëshiruara nga qytetari shqiptar në Maqedoninë e Veriut”, thekson Neziri.
Në prognozën e rezultateve, duke analizuar ato paraprake në ciklet e kaluara zgjedhore, dhe sondazhet e ndryshme, Neziri thekson se renditja e partive në zgjedhje do të ishte si vijon: “Nëse merren si pikëorientim votat e grumbulluara në zgjedhjet lokale të vitit 2017, atëherë ASH do të numëronte 6-7 deputetë, kurse Alternativa 2-3 deputetë. Në bazë të rezultateve zgjedhore, Alternativa do të fitonte një deputet në zonën e parë, një në zonën e dytë kurse me pikëpyetje do të ishte deputeti në të gjashtën. ASH do të fitonte një deputet në njësinë e pestë, një në të dytën dhe katër në të gjashtën. Sipas këtyre treguesve, por edhe anketave të besueshme për rejtingun aktual, në varijatin më optimist koalicioni ASH-AA do të fitonte 10, kurse atë më pesimist – 6 deputetë. Nga ana tjetër, po në bazë të rezultateve nga zgjedhjet e fundit lokale dhe anketave, BDI do të fitonte 10-12, BESA 1-2 deputetë, kurse PDSH 1 deputet”.
Neziri ka komentuar edhe përplasjet e fundit në mes Lëvizjes Besa dhe ASH-së duke treguar që koalicioni ASH-AAA ka qenë i gatshëm, ndërsa tani vetëm është zyrtarizuar: “Vendimi që në koalicion të shkohet me Alternativën, e jo me Besën, mendoj se në ASH është marrë shumë më herët. Në bazë të rezultateve nga zgjedhjet e fundit lokale të vitit 2017, partia e Selës ka një përkrahje të konsiderueshme në njësitë 5 dhe 6, por qëndron jo aq mirë në njësitë 1 dhe 2. Matematikat e ASH-së janë se me Alternativën do të arrijë të mbulojë të gjitha njësitë zgjedhore që nxjerrin deputetë shqiptarë dhe kështu ta konkurrojë më seriozisht Bashkimin Demokratik për Integrim (BDI) të Ali Ahmetit”, përfundon Neziri.