Në mesin e email-eve të ish-drejtorit të Përgjithshëm të Policisë së Shtetit, Gledis Nano, të rrjedhura online nga një grup hakerash, gjenden edhe letërkëmbimet e tij me zyrtarët e Departamentit të Shtetit.
Një zyrtar i DASH, Clay Stiffler, i shkruan atij duke i kërkuar që luftëtarët shqiptarë që janë në Siri, të riatdhesohen pasi kështu do jetë më i lehtë kontrolli mbi ta. Më tej, ai i shkruan Nanos duke i thënë se FBI është gati të ofrojë ndihmë për të lokalizuar Adriatik Llallën.
Por ata kërkojnë informacione të detajuara nga Policia e Shtetit për Llallën, që mund të ndihmojnë në gjurmimin e tij.
Duke shkruar për riatdhesimin e shqiptarëve që luftojnë në Siris, ai shkruan: “Shqipëria ka pranuar që të riatdhesojë gratë dhe fëmijët, por Ministria e Brendshme mesa duket nuk riatdheson luftëtarët e huaj meshkuj. E kam ngritur këtë çështje me Lori Pëllumbin dhe i tregova provën që kemi për të dënuar këta burra kur t’i kthejmë, por nuk kam marrë një përgjigje. Koosova do i bashkohet riatdhesimit dhe do rikthejë 17 burra, përveç 6 që i sollën në korrik. Meqë kemi prova të mira kundër shqiptarëve, mendoj se do të ishte mirë që t’i sillnim këtu, ku Shqipëria mund t’i monitorojë, në vend që t’i lëmë në kampe, ku mund të arratisen. Nëse ke ndonjë ide se me kë duhet të flas, do e vlerësoja”.
Më tej, në email-in e datës 3 dhjetor flitet për çështjen e Llallës. Këtu çështja bëhet akoma më qesharake, pasi FBI-së i kërkohet të lokalizojë Llallën, kurse ata kërkojnë të dhënat se ku mund të jetë Llalla.
“Çështja e dytë që doja të diskutoja me ju është Adriatik Llalla. Kam folur me atasheun ligjor të FBI dhe ata kanë ofruar ndihmë për të lokalizuar Llallën. Për të nisur, na duhet një letër nga Policia e Shtetit që kërkon ndihmën e tyre, plus identifikuesit e tij, emrat e familjarëve, vendndodhja e fundit, ish-adresat në Shqipëri dhe jashtë, dhe ndonjë pistë tjetër që mund të ndihmojë në gjurmimin e tij. Mund të hartoj një letër nëse do. Fola me Arben Krajën dhe prokurorin e çështjes, dhe ata janë të dy të interesuar për të pasur ndihmën e FBI për të ndihmuar në gjetjen e zotit Llalla”.
Në përgjigjen e shkurtër, Nanos thotë se mund të diskutojnë për çështjen e parë. Sa i përket Llallës, ai thotë se do hartojnë një memo për FBI-në, ku të kërkojnë ndihmën e tyre.
