Sekretari britanik i Thesarit, Jeremy Hunt dhe guvernatori i Bankës së Anglisë, Andrew Bailey bëjnë thirrje për kufizim të pagave për të ndihmuar në frenimin e inflacionit.
Pagat në Britani të Madhe u rritën me normën më të shpejtë të regjistruar në tre muaj deri në maj, duke u rritur me 7.3 për qind nga e njëjta periudhë e vitit të kaluar.
Siç deklaron Zyra Kombëtare e Statistikave, tregu i punës tregoi shenja lehtësimi, pasi shkalla e papunësisë u rrit papritur nga 3.8 për qind në 4 për qind në tre muajt deri në prill, ndërsa vendet e lira të punës vazhduan të bien.
Shkalla e punësimit u rrit në 7.6 për qind si pasojë e rritjes së punësimit me kohë të pjesshme.
Norma e pasivitetit ekonomik, ka rënë nga tremujori paraardhës në 20.8 për qind, duke vijuar prirjen rënëse të kohëve të fundit.
Banka e Anglisë, ka paralajmëruar vazhdimisht se rritja e lartë e pagave, mbetet një pengesë e rëndësishme në përpjekjet e saj, për të ulur inflacionin dhe shifrat e sotme nuk do të bëjnë asgjë për ta bindur atë, se tregu i punës nuk ka arritur limitin, duke e lënë atë të arrijë në përfundimin se politika monetare ka nevojë për t’u shtrënguar më tej.
