Nis kthimi i shqiptarëve nga Italia, Cakaj me “Lasgushin” në Romë
Ministria e Jashtme, në bashkëpunim me Ministrinë Infrastrukturës, të Brendshme dhe atë të Shëndetësisë kanë nisur operacioni për riatdhesimin e shqiptarëve të bllokuar jashtë vendit, për shkak të situatës që krijoi pandemia e COVID-19
Ministri Gent Cakaj, po udhëton drejt Romës, për të siguruar përmbylljen e të gjithë procedurave dhe për të siguruar sjelljen e 120 shqiptarëve drejt atdheut.
Qeveria ka kërkuar ndihmën e kompanisë “Air Albania” e cila është treguar e gatshme dhe ka vënë në dispozicion avionin “Lasgushi” për kryerjen e këtij operacioni.
Operacioni do të vijojë gjatë gjithë javës duke bërë të mundur kthimin e shqiptarëve të mbetur në shtete të ndryshme, nëpërmjet rrugëve tokësore dhe ajrore.
Rikthimi i qytetarëve, sipas prononcimit të MEPJ, do të bëhet sipas tre kategorive në të cilat përfshihen: qytetarët shqiptarë që kanë qëndruar më shumë se 90 ditë në vendet ku ata janë bllokuar, studentët shqiptarë në vendet ku ata studiojnë dhe rastet humanitare.
