Ka nisur tashmë mbledhja e Këshillit Politik, ku pritet të diskutohen draftet e PS-së e PD-së për kodin zgjedhor, në veçanti listat zgjedhore e koalicionet.
Përpara hyrjes në mbledhje, përfaqësuesi i PD-së në Këshill, Oerd Bylykbashi, u shpreh se prej dy javësh PS po bllokon procesin duke mos pranuar të dërgojë një kërkesë në OSBE/ODIHR për çështjen e koalicioneve zgjedhore.
Bylykbashi: Ka më shumë se dy javë që opozita i ka kërkuar KP-së që t’i drejtohet ODIHR për çështjen thelbësore, atë të koalicioneve. PS refuzon të dërgojë kërkesën në ODIHR, që është shkelje e drejtpërdrejtë e marrëveshjes. Këto janë veprime që dëmtojnë procesin konsensual dhe vënë në rrezik procesin e integrimit.
Kujtojmë se për koalicionet, palët janë në kahe të kundërta, kjo pasi opozita kërkon të mbajë në fuqi ligjin aktual për koalicionet, ndërsa PS ka kërkuar ndryshimin e saj.