Viti 2022 u karakterizua nga agresioni rus në Ukrainën fqinje, me dhunën që çoi në vdekjen e dhjetëra mijëra ushtarëve dhe civilëve.
Por disa figura publike ruse vdiqën gjithashtu në vitin 2022, duke përfshirë udhëheqësin e fundit të Bashkimit Sovjetik, Mikhail Gorbachev dhe nacionalistin ekstrem Vladimir Zhirinovsky.
Në këtë drejtim ua sjellim nëntë nga vdekjet “që tronditën Rusinë”, duke përfshirë burra dhe gra, shumica e të cilave ishin rezultat i drejtpërdrejtë i luftimeve në Ukrainë.
Lista përmban të paktën një atentat dhe disa vdekje ende të pashpjegueshme.
Vladimir Zhirinovsky
Një demagog dhe themelues i Partisë ultra-nacionaliste Liberale Demokratike të Rusisë (LDPR), Vladimir Zhirivosky vdiq në moshën 75-vjeçare në prill pasi u sëmur me COVID-19.
Zhirinovsky lindi në varfëri në Kazakistan dhe krijoi partinë e parë politike të Bashkimit Sovjetik – përveç Partisë Komuniste – në 1989 (sipas disa raporteve, ai mori ndihmë nga KGB).
Ndërsa popullariteti i LDPR shkaktoi panik midis disave në vitet 1990, partia më vonë ra nën kontrollin e Kremlinit dhe u bë pjesë e të ashtuquajturës “opozitë sistematike”.
I përshkruar shpesh si një klloun, Zhirinovsky dukej se parashikonte pushtimin e afërt të Ukrainës kur fliste në parlamentin rus në fund të vitit 2021, pak muaj para vdekjes së tij.
Darya Dugina
Vajza e ideologut të së djathtës ekstreme Aleksandr Dugin, 29-vjeçarja Darya Dugina u vra në gusht kur një bombë e vendosur nën Toyota Land Cruiser-in e saj shpërtheu ndërsa ajo po kthehej në shtëpi nga një festival nacionalist në rajonin e Moskës.
Vrasja e komentatores së njohur televizive mbetet mister.
Zyrtarët amerikanë thanë në tetor se Kievi qëndronte pas shpërthimit të makinës me bombë, megjithëse nuk thanë nëse objektivi i synuar kishte qenë Dugina ose babai i saj, i cili supozohej të ishte në makinë me të në atë kohë.
Zyrtarët rusë akuzuan shpejt Kievin se qëndron pas sulmit, megjithëse Kievi ka mohuar çdo përfshirje.
Yakov Rezantsev
Komandanti i Ushtrisë, Yakov Rezantsev thuhet se është oficeri rus i rangut më të lartë që ka vdekur në Ukrainë deri më sot, përcjell Telegrafi.
I lindur në fshatin Elbanka, një vendbanim i vogël në brigjet e lumit Charysh në rajonin juglindor të Altai Krai të Rusisë, Rezantsev me sa duket u vra pranë bazës ajrore Chernobaivka në rajonin Kherson të Ukrainës jugore në mars.
Pasi thuhet se shërbeu në Siri, Rezantsev u bë gjeneral-lejtnant në vitin 2021.
Vdekja e Rezantsev nuk është konfirmuar zyrtarisht nga Moska.
Mikhail Gorbaçov
Udhëheqësi i fundit i Bashkimit Sovjetik, Mihail Gorbachev vdiq më 30 gusht në moshën 91-vjeçare.
I lavdëruar në Perëndim për reformat e tij politike, Gorbaçovi u përbuz nga shumë në Rusi për drejtimin e Bashkimit Sovjetik drejt rënies së tij.
Disa nga armiqtë politikë të Gorbaçovit vdiqën gjithashtu këtë vit: duke përfshirë dy nënshkrues të Marrëveshjes së Belovezhit, që shpërbëu në mënyrë efektive Bashkimin Sovjetik – ish-presidenti ukrainas Leonid Kravchuk dhe ish-udhëheqësi bjellorus Stanislav Shushkevich.
Ndryshe nga pasardhësit të tij, Boris Jelcin, Gorbaçovit nuk iu bë një funeral shtetëror dhe presidenti rus Vladimir Putin nuk mori pjesë në varrimin e tij.
Kirill Stremousov
Një figurë politike e katapultuar në qendër të vëmendjes nga lufta në Ukrainë, politikani pro-rus ukrainas Kirill Stremousov vdiq në një aksident automobilistik në nëntor.
Zëvendës-kreu i rajonit Kherson të Ukrainës, i instaluar nga Moska, Stremousov ishte një mbështetës i hapur i pushtimit të Ukrainës.
Megjithatë, dy ditë përpara se trupat e fundit ruse të dilnin nga Kherson, Stremousov vdiq kur një makinë në të cilën ai po udhëtonte u përplas me dy automjete të tjera.
Ravil Maganov
Drejtori i gjigantit rus të naftës LUKoil, Ravil Maganov, vdiq në shtator pasi ra nga një dritare e katit të gjashtë në Spitalin Qendror të Klinikës së Moskës, përcjell Telegrafi.
Në atë kohë, LUKoil tha se biznesmeni me origjinë tatare “kishte vdekur pas një sëmundjeje të rëndë”, pa ofruar informacione të mëtejshme.
Mediat shtetërore ruse e raportuan vdekjen e 67-vjeçarit si vetëvrasje.
Por tre persona të afërt me Maganov thanë në atë kohë se ata besonin se ishte shumë e pamundur që ai të kishte vrarë veten.
Maganov është në mesin e një numri të figurave të drejtuesve të profilit të lartë rusë që kanë vdekur në rrethana të paqarta në vitin 2022.
LUKoil, kompania e dytë më e madhe e naftës në Rusi, ishte një nga korporatat vendase që bëri thirrje hapur për t’i dhënë fund pushtimit të Ukrainës.
Oksana Baulina
Gazetarja ruse Oksana Baulina u vra në Kiev në mars nga një sulm raketor rus ndërsa raportonte për “The Insider”.
Një ish-ndihmëse e liderit të opozitës ruse Alexei Navalny, Baulina, 42 vjeçe, shkoi në Ukrainë si reportere pak pasi filloi pushtimi rus.
Ajo dërgoi mesazhe nga Lviv dhe Kiev për shkatërrimin e shkaktuar nga raketat ruse.
Baulina shkoi për të dokumentuar pasojat e një sulmi në rrethin Podolskiy të Kievit më 23 mars, kur u vra në një tjetër breshëri raketash ruse.
Ajo u përshkrua pas vdekjes si “jashtëzakonisht e guximshme, por kurrë e pamatur apo e papërgjegjshme, duke e drejtuar gjithmonë energjinë e saj mbinjerëzore për kauzat më të drejta”.
Yevgeniy Nuzhin
Ish i burgosuri Yevgeny Nuzhin, 55 vjeç, vdiq në nëntor kur u qëllua për vdekje në një vrasje të dukshme hakmarrjeje të kryer nga grupi mercenar rus Wagner.
I rekrutuar katër muaj më parë nga Wagner për të luftuar në Ukrainë ndërsa vuante një dënim 24-vjeçar për vrasje në një burg rus, Nuzhin ishte një nga mijëra të burgosurit, të cilëve u ishte premtuar lirim i parakohshëm sipas një skeme “për të forcuar numrin e trupave ruse”.
Por menjëherë pas kësaj, Nuzhin iu dorëzua forcave ukrainase, duke deklaruar në një intervistë të shtatorit, ndërsa ishte rob lufte, se ai gjithmonë kishte synuar të dezertonte.
Sidoqoftë, ai nuk qëndroi në robërinë ukrainase për një kohë të gjatë dhe u kthye në Rusi në një shkëmbim të burgosurish.
Në duart e Wagner-it, ai me sa duket u ekzekutua.
Valery Polyakov
Kozmonauti sovjetik Valery Polyakov vdiq më 19 shtator në moshën 81-vjeçare.
I famshëm për qëndrimin në stacionin hapësinor Mir për 437 ditë, Polyakov kontribuoi në kërkimin mbi aftësitë e trupit të njeriut.
Ai kishte lindur në kulmin e Luftës së Dytë Botërore në qytetin perëndimor rus të Tula.
Polyakov bëri një total prej dy ekspeditash hapësinore gjatë të cilave ai kaloi gjithsej 678 ditë dhe 16 orë në orbitë.
