Një grua që kishte qëndruar në një shtëpi për gra që janë rehabilituar nga varwsia e alkoolit në Kaliforni, vodhi një minifurgon dhe u ndoq nga policia për orë të tëra derisa kaloi në Meksikë të hënën.
Një grua e dytë, Nicolle Walters, 45 vjeç, u raportoi autoriteteve se Toyota Sienna e saj gri e vitit 2004 mungonte, së bashku me çelësin e makinës së saj, sipas një deklarate nga zyra e sherifit të qarkut Ventura.
Walters, pronare dhe operatore e dy shtëpive për gra të rehabilitimit, e identifikoi të dyshuarën si Alyssa Wilson, një nga banoret në Diana’s House Sober Living në Thousand Oaks, e cila është rreth një orë larg me makinë në veriperëndim të Los Angeles.
“Çelësat u vodhën nga çanta e administratorit të shtëpisë sime. Rastësisht ndalova pikërisht kur po ndodhte kjo”, tha ajo, duke shtuar se minifurgoni përdoret për detyrat e shtëpisë për gratë që nuk kanë nevojë për alkool.
Zyrtarët e gjurmuan veturën rreth 19 km në veri të Simi Valley, ku u përpoqën ta ndalonin automjetin, por Wilson refuzoi të ndalonte dhe u largua me shpejtësi.
Ajo arriti shpejtësinë prej rreth 145 km/orë në autostradën 118 derisa ndjekja vazhdoi në qarkun e Los Anxhelosit. Atje, autoritetet e qarkut Ventura ia dorëzuan ndjekjen patrullës së autostradës së Kalifornisë (CHP) pasi Wilson hyri në autostradën 405 duke u drejtuar në jug, thuhet në deklaratë.
“Kjo është shumë unike në kuptimin e kushteve të trafikut që u lejojnë individëve të vazhdojnë të qëndrojnë në autostradë dhe ta zgjasin këtë ndjekje”, tha kapiten Robert Yoos, një oficer i informacionit publik në zyrën e sherifit të qarkut Ventura, gjatë një interviste me KTLA-TV.
Wilson shmangu të gjitha shiritat me thumba të hedhur në rrugë nga autoritetet, sipas videove nga helikopteri të publikuara nga ABC7.
Ndjekja përfundimisht arriti në kufirin SHBA-Meksikë deri në orën 13:30, sipas Walters, ku CHP përfundoi ndjekjen e saj për shkak të kufizimeve juridiksionale.
Walters tha të martën se automjeti ishte në Tijuana, Meksikë, dhe se ajo po punonte me CHP për ta rimarrë atë.
“Në fund të fundit, nuk shqetësohem për makinën. Jam më e qetë duke e ditur se ajo nuk është lënduar. Makina është e zëvendësueshme”, tha Walters.
Walters, si pronare e Diana’s House Sober Living që nga tetori i vitit 2024, e pranon se rruga drejt rikuperimit nga varësia dhe trauma nuk është gjithmonë lineare.
“Kjo është një krizë e shëndetit mendor dhe abuzimit me substanca. Ne kemi nevojë për më shumë mbështetje. Ne kemi nevojë për më shumë burime për ata që po përballen me vështirësi. Rikuperimi nuk është gjithmonë i bukur”, tha ajo.
