Janë publikuar disa pamje të një momenti kur një protestues në rrugët e Ballymena-s u dogj ndërsa kaosi vazhdoi të përhapej në Irlandën e Veriut për natën e dytë radhazi.
Pamjet filmike treguan një protestues të përfshirë nga flakët ndërsa protestuesit hodhën bomba molotov, fishekzjarrë dhe gurë kundër oficerëve të policisë – të cilët dënuan ‘sulmin racist’ të protestuesve, përcjell Telegrafi.
Shtatëmbëdhjetë oficerë policie u lënduan gjatë dhunës, ndërsa protesta të tjera u zhvilluan gjithashtu në Belfast, Lisburn, Coleraine, Carrickfergus dhe Newtownabbey.
Makinat dhe pronat u dogjën gjithashtu në Ballymena pasi dhuna shpërtheu për herë të parë të hënën pas një proteste paqësore prej 2,500 personash që u shndërrua në kaos.
Shërbimi Policor i Irlandës së Veriut (PSNI) vendosi policinë kundër trazirave, si dhe njësi qensh, ndërsa luftonin për të rivendosur rendin.
Kjo vjen pasi dy djem 14-vjeçarë – të cilët të dy kishin nevojë për një përkthyes rumun në gjykatë – u akuzuan për tentativë përdhunimi të një vajze adoleshente më 7 qershor.
Një arrestim i tretë u bë në lidhje me sulmin e dyshuar seksual të hënën në mbrëmje, pasi një burrë 28-vjeçar u mor në pyetje dhe më pas u lirua.
Ndihmës Shefi i Policisë, Ryan Henderson tha se priten arrestime të tjera pas shqyrtimit të pamjeve video dhe tha se PSNI po punonte në mënyrë aktive për të identifikuar ata që janë përgjegjës për çrregullimin ‘me motive racore’.
Henderson shtoi se do të ketë një operacion të rëndësishëm policor në qytet në ditët në vijim për të qetësuar komunitetin.
Oficerët e policisë nga Anglia dhe Uellsi do të dërgohen në Irlandën e Veriut nëse është e nevojshme për të ndihmuar PSNI-në, shtoi oficeri i lartë i policisë. /Telegrafi/
