Sir Jim Ratcliffe raportohet se ka konfirmuar se firma e tij Ineos ka hyrë zyrtarisht në garë për të blerë Manchester United.
Glazer-s njoftuan planet e tyre për të shitur United në nëntor 2022, 17 vjet pas marrjes së drejtimit në “Old Trafford”.
Ata duan 5 miliardë paund për klubin dhe Ineos ka hyre zyrtarisht në garë për të blerë klubin historik anglez, sipas “The Times”.
Ratcliffe zotëron klubin e Nice dhe Lausanne dhe një të tretën e ekipit Mercedes të Formula 1, si dhe disa interesa të tjera sportive.
Ofertat zyrtare janë vendosur të fillojnë në shkurt dhe pritet të vijnë oferta nga palët në SHBA, Lindjen e Mesme dhe Azi.
Ratcliffe renditet nga “Forbes” si njeriu më i pasur i Britanisë.
United nuk është i vetmi klub anglez që Ratcliffe është përpjekur të blejë, pasi ai gjithashtu bëri një ofertë për Chelsea-n vitin e kaluar kur ata u nxorën në shitje nga Roman Abramovich.
Ai njihet si tifoz i United, por Ratcliffe në tetor 2022 mohoi zërat se mund të blinte klubin, pavarësisht se koha kur britaniku u pyet nga mediat ishte një muaj para se Glazer-s të nxirrnin në shitje aksionet e tyre.
Ndërkohë, në shtator 2022 mediat britanike raportuan se piloti i Formula 1, Lewis Hamilton dëshironte të bashkohej me Ratcliffe për të formuar një grup i cili kishte interes blerjen e Manchester United.
