Policia indiane ka thënë se duket se nuk ka të mbijetuar nga aeroplani i Air India që u rrëzua të enjten.
Kjo është raportuar nga media të huaja, duke u thirrur në deklarimet e një komisioneri të policisë së qytetit për Associated Press.
Air India ka thënë se pasagjerët në fluturimin e saj AI171 përfshinin 169 shtetas indianë, 53 britanikë, shtatë portugezë dhe një kanadez, përcjell Telegrafi.
Në një deklaratë në X, Air India tha: “Air India konfirmon se fluturimi AI171, nga Ahmedabad në Londër Gatwick, u përfshi në një aksident sot pas ngritjes”.
“Fluturimi, i cili u nis nga Ahmedabad në orën 13:38, mbante 242 pasagjerë dhe anëtarë të ekuipazhit në bordin e aeroplanit Boeing 787-8. Nga këta, 169 janë shtetas indianë, 53 janë shtetas britanikë, një shtetas kanadez dhe shtatë shtetas portugezë”.
Air India po ofron bashkëpunim të plotë autoriteteve që hetojnë këtë incident.
Bëhet fjalë për një aeroplan të Air India i cili ishte rrëzuar pak pasi kishte nisur fluturimin nga aeroporti i qytetit perëndimor të Indisë, Ahmedabad.
Aeroplani që udhëtonte për në Londër u rrëzua në një zonë banimi të quajtur Meghani Nagar dhe rrëzimi ndodhi pesë minuta pas ngritjes në orën 13:38 sipas orës lokale.
Ky është rrëzimi i parë i një aeroplani Boeing 787, sipas bazës së të dhënave të Rrjetit të Sigurisë së Aviacionit.
Sipas mediave, 787 Dreamliner është një aeroplan me trup të gjerë dhe dy motorë.
Modeli ka kryer më shumë se pesë milionë udhëtime në 14 vitet që nga fluturimi i tij i parë i pasagjerëve. /Telegrafi/
