Diplomati nga Kosova, Petrit Hajdari është në garë për deputet nga Partia Demokratike e Kosovës (PDK), dhe beson që me punën që ka bërë deri më tani dhe mbështetjen që ka nga qytetarët do të jetë një zë i fuqishëm në Parlamentin e Kosovës.
Ai përmes një adresimi për qytetarë thotë se në përballje keni disa opsione, dhe ai është njëri prej këtyre opsioneve, opsion që beson të jetë më i miri në këtë fazë në të cilën po kalon Kosova
“Siç e dini, tashmë ka filluar zyrtarisht fushata zgjedhore. Në përballje i keni disa opsione, dhe unë jam pjesë e njërit prej këtyre opsioneve. Opsionit që realisht e besoj të jetë më i miri në këtë fazë në të cilën po kalon Kosova. Është jashtëzakonisht me rëndësi që, sado joshëse që mund të duken, revolucionarizmave koti të mos iu bindemi. Njerëzimi ec përpara me evolucion, jo me revolucion.
Të dashur qytetarë të Republikës së Kosovës,
Unë nuk do të isha këtu po të mos isha i bindur se refleksin analitik për ta kuptuar drejt mashtruesin e të gjitha kauzave, populli i Kosovës e ka. Natyrisht, kosovarët kanë vërejtje për qeverisjen, dhe i kanë me të drejtë. Por, asnjëherë në historinë politike moderne, zgjidhje nuk janë gjetur përmes eksperimenteve.
Partia Demokratike e Kosovës nuk është eksperiment. Është një formacion politik konstant, që e ngrit partinë duke e ngritur shtetin, e jo duke e rrënuar e sulmuar atë. Prandaj jam kandidat. Prandaj e kërkoj votën tuaj për vete, dhe për subjektin politik që e përfaqësoj PDK. E gjithashtu, jam thellësisht i bindur që së bashku, do t’ia dalim, si edhe më parë, ta bëjmë Kosovën një vend të mirë për jetë.
Për fund, kam një lutje që nuk ka lidhje me votën. Kush është në pushtet e kush është në opozitë, është vendimi juaj. Por, edhe një vendim tjetër i juaji, është qasja që do të zgjedhim ndaj vendit tonë. Nëse thuhet që PDK e ka faturën për të këqijat që i kanë ndodhur vendit, duhet thënë gjithashtu, që e ka edhe meritën për të mirat. E të mira ka pasur shumë. Mohimi nuk na çon askund, sepse historia nuk nis me asnjërin prej nesh.
Prandaj, kandidoj. Për të ndihmuar në Rimëkëmbjen e vendit, që besoj se vjen veç me PDK-në, e për ta fuqizuar një narrativ historik, që lind me UÇK-në, e i cili po tentohet të ndryshohet.
E pafshim Kosovën në ditë çdo herë e më të bardha.
#PDK134 #Rimëkëmbje #petrithajdari70”, shkruan Hajdari në Facebook.
Hajdari që nga themelimi ka qenë pjesë e PDK-së, fillimisht në strukturat e Rinisë Demokratike të Kosovës në nivel lokal e qëndror. Ka qenë gjithashtu anëtar i kryesisë së degës së PDK-së në Drenas dhe këshilltar në Asamblenë Komunale për dy mandate (2007-2009 dhe 2009-2013). Nga viti 2008 deri në vitin 2014 ka punuar në Zyrën e Kryeministrit, ndërsa nga viti 2014-2020 ka shërbyer në mision diplomatik në Ambasadën e Kosovës në Lubjanë si konsull.
