Kreu i Organizatës Botërore të Shëndetësisë u bëri thirrje të hënën vendeve që të punojnë së bashku për t’i dhënë fund fazës akute të pandemisë, duke thënë se tani kanë të gjitha mjetet në dispozicion për ta bërë këtë.
“Pandemia COVID-19 tani po hyn në vitin e tretë dhe ne jemi në një pikë kritike”, tha Tedros Adhanom Ghebreyesus në një konferencë shtypi së bashku me ministren e zhvillimit të Gjermanisë Svenja Schulze.
“Ne duhet të punojmë së bashku për t’i dhënë fund fazës akute të kësaj pandemie. Nuk mund ta lëmë atë të vazhdojë të zvarritet, duke u përshkuar mes panikut dhe neglizhencës”, ka thënë ai.
Tedros tha të hënën se Gjermania ishte bërë donatori më i madh i agjencisë, pa dhënë detaje. Historikisht, Shtetet e Bashkuara kanë dhënë kontributin më të madh financiar midis shteteve anëtare për organizatën.
Schulze tha se përparësia kryesore e Gjermanisë, e cila mori përsipër Presidencën e G7, është t’i japë fund pandemisë në mbarë botën dhe bëri thirrje për një “fushatë vaksinimi të përshpejtuar masivisht, vërtet globale” për ta bërë këtë.
Ngjarja në Gjenevë nis një javë të mbledhjeve të Bordit Ekzekutiv të OBSH-së, ku do të diskutohen aspektet kryesore të së ardhmes së agjencisë shëndetësore të KB, duke përfshirë ofertën e Tedros për një mandat të dytë dhe një propozim për ta bërë agjencinë më të pavarur financiarisht.
