Organizata Botërore e Shëndetësisë ka lutur njerëzit të anulojnë planet e tyre për fetë në fundvit që të mbrohet shëndeti publik nga shpërndarje e shpejtë e variantit të ri të koronavirusit, Omicron.
“Një ngjarje e anuluar është më mirë se anulim i gjithë jetës”, ka thënë shefi i OBSH-së, Tedros Adhanom Ghebreyesus, duke shtuar se nganjëherë duhen marrë “vendime të vështira”.
“Në disa raste kjo do të thotë anulim ose edhe shtyrje planesh”, ka deklaruar ai.
Komentet e tij erdhën pasi ekspertët shëndetësorë deklaruan se Omicroni është varianti dominues në SHBA.
Tedros u shpreh se tani ka dëshmi se varianti “shpërndahet shumë më shpejt se varianti Delta”.
Një numër shtetesh – përfshirë Francën e Gjermaninë – tashmë kanë marrë masa shtesë për të parandaluar përhapjen e virusit. Holanda po ashtu.
Shtëpia e Bardhë ka thënë se presidenti amerikan, Joe Biden, s’po planifikon të mbyllë shtetin, por është këshilluar të shmangen vizitat në disa shtete.
