Donald Trump ka nisur ofensivën tregtare kundër të gjithëve. Të mërkurën, presidenti amerikan njoftoi vendosjen e tarifave speciale prej 25 për qind për të gjitha makinat që nuk janë prodhuar në SHBA. Ai tha se masa do të hyjë në fuqi më 2 prill.
Masa e Trump prek veçanërisht Gjermaninë si një vend eksportues me prodhim të madh makinash.
“Ne do të vendosim masa taksuese ndaj të gjitha vendeve, për të bërë biznes në vendin tonë dhe duke marrë përsëri mbrapsht vendet tona të punës. Duke marrë shumë gjëra të cilat na janë marrë më përpara. Miqtë kanë qenë shpesh herë më keq se armiqtë tanë. Dhe kjo është shumë modeste. Ajo çfarë do të bëjmë është të vendosim një tarifë prej 25 për qind për të gjitha makinat të cilat nuk prodhohen në SHBA. Nëse prodhohen në SHBA nuk do të kenë kurrë tarifa.”
Aktualisht, tarifat e importit të makinave në SHBA janë 2.5 për qind. Në BE, tarifat janë vetëm dhjetë për qind për makinat që vijnë nga SHBA. Trump beson se tarifat më të larta të BE-së e vënë industrinë amerikane në disavantazh.
Aktualisht, shumë më pak makina eksportohen nga SHBA në Evropë sesa anasjelltas. Sipas të dhënave nga Administrata Ndërkombëtare e Tregtisë, vitin e kaluar në SHBA janë shitur 784,889 automjete evropiane. 446.566 nga këto automjete vijnë nga Gjermania. Kjo e bën Republikën Federale të Gjermanisë deri tani vendin më të rëndësishëm të prodhimit evropian.
Në të kundërt, 217,230 makina u sollën nga SHBA në Evropë. Eurostat numëron pak më pak automjete, por raporti është i ngjashëm.
BE, por edhe Japonia dhe Kanadaja po shqyrtojnë kundërmasa. Trump kërcënon të përshkallëzojë ndjeshëm konfliktet tregtare globale.
Presidentja e Shoqatës Gjermane të Industrisë së Automjeteve (VDA), Hildegard Müller, e përshkroi vendimin e Trump si një sinjal fatal për tregtinë e lirë dhe të bazuar në rregulla.
Komisioni i BE-së, i cili është përgjegjës për politikën tregtare, ka njoftuar tashmë se do të kundërpërgjigjet në mënyrë të vendosur dhe të qartë. Ajo kohët e fundit kishte paralajmëruar Trump urgjentisht kundër futjes së tarifave të reja. Presidentja e Komisionit të BE-së Ursula von der Leyen tha pas shpalljes së tarifave të reja se kompanitë evropiane do të mbrohen. BE-ja do të përpiqet për zgjidhje të negociuara, tha ajo.
Japonia është prekur nga tarifat pothuajse edhe më shumë se Gjermania. Kryeministri japonez Shigeru Ishiba deklaroi gjithashtu se Tokio së shpejti do t’i përgjigjet tarifave të reja amerikane të makinave.
