Presidenti rus Vladimir Putin ofroi të enjten mbështetje për kompanitë kineze që dëshirojnë të mbushin vendet e lëna nga kompanitë perëndimore që janë larguar nga vendi, për shkak të fushatës ushtarake të Rusisë në Ukrainë.
“Ne jemi të gatshëm të mbështesim kompanitë kineze për të zëvendësuar prodhimet e kompanive perëndimore që janë larguar nga Rusia”, deklaroi ai në fillim të takimit me homologun e tij kinez, Xi Jinping. Pas fillimit të ndërhyrjes së Rusisë në Ukrainë, rreth 120 kompani perëndimore nga sektorë të ndryshëm njoftuan ndërprerjen e përkohshme të aktiviteteve të tyre në Rusi ose daljen përfundimtare nga tregu, gjë që ndikoi në ekonominë ruse, e cila po kërkon alternativa për këto mallra.
Përtej çështjeve tregtare dhe ekonomike që shqetësojnë të dy vendet, Rusia tashmë ka një përgjigje për planin e paqes të paraqitur nga Presidenti kinez, Xi Jinping, për t’i dhënë fund një herë e mirë luftës në Ukrainë: “Ne besojmë se shumë nga dispozitat e planit të paqes të paraqitur nga Kina janë në përputhje me qasjet ruse dhe mund të merren si bazë për një marrëveshje paqeje kur në Perëndim dhe në Kiev të jenë gati, tha Putin.
Në Uashington ishin kritikë ndaj vendimit të Presidentit kinez për të bërë udhëtimin e tij të parë ndërkombëtar në Moskë për t’u takuar me Putinin. Sekretari amerikan i Shtetit, Antony Blinken tha se plani i Xi Jinping “mund të jetë një hile që lejon Rusinë të blejë kohë përballë një kundërofensive të mundshme ukrainase dhe të ndalojë luftën sipas kushteve të saj”.
