OKB-ja bëri sot një apel humanitar prej rreth 29 miliardë dollarësh (26 miliardë euro), për t’u ardhur në ndihmë një numri rekord personash të prekur nga ndryshimet klimatike dhe rritja e konflikteve afatgjata.
Një raport i titulluar “Global Humanitarian Overview” thekson se rreth 168 milionë persona në botë do të kenë nevojë për një ndihmë urgjente vitin e ardhshëm.
“Kjo shifër shënon një rekord në kohët moderne, që prej Luftës së Dytë Botërore”, deklaroi për gazetarët zëvendëssekretari i përgjithshëm i Kombeve të Bashkuara për Çështjet Humanitare, Mark Lowcock.
Ai shpjegoi që nevojat po rriteshin pjesërisht sepse konfliktet po bëhen më të gjata dhe më intensive.
“E vërteta e hidhur është që viti 2020 do të jetë i vështirë për miliona persona”, theksoi ai.
Mes 168 milionë personave që do të kenë nevojë për një asistencë vitin e ardhshëm, apeli për fonde prej 28,8 miliardë dollarë do të synojë veçanërisht 109 milionë personat që kanë më shumë nevojë./ATSH/
