Disa agjenci të Kombeve të Bashkuara paralajmëruan sot për dëmin e shkaktuar nga informacioni i rremë në lidhje me pandeminë e COVID-19.
“Keqinformimi kushton jetë njerëzish. Pa besimin e duhur dhe informacionin e saktë, testet diagnostike kalojnë pa u përdorur, fushatat e imunizimit (ose fushata për promovimin e vaksinave efektive) nuk do të përmbushin synimet e tyre dhe virusi do të vazhdojë të lulëzojë”, thanë në një deklaratë të përbashkët Organizata Botërore e Shëndetësisë, UNICEF dhe agjencitë e tjera.
“Gjithashtu, keqinformimi po amplifikon gjuhën e urrejtjes, po rrit rrezikun e konfliktit dhe shkeljet e të drejtave të njeriut, si edhe kërcënon perspektivat për përparimin e demokracisë”, vazhdon deklarata.
Agjencitë u bënë thirrje vendeve të zhvillojnë dhe zbatojnë plane veprimi për të promovuar shpërndarjen e informacionit të saktë dhe për të parandaluar përhapjen e informacionit të rremë.
