Vëllai i kryeministrit Edi Rama, Olsi Rama është thirrur ditën e sotme në SPAK. Ai është paraqitur pranë Prokurorisë së Posaçme rreth orës 13:30, ku ka marrë në zarf vendimmarrjen e prokurorisë mbi kallëzimin për “shpifje” të bërë prej tij ndaj deputetit demokrat, Gazment Bardhi.
Përmbajtjen ka zgjedhur të mos e ndajë me gazetarët, teksa ka mohuar edhe njëherë çdo pretendim të ngritur nga Bardhi.
“Nuk kam asnjë lidhje. Ju e dini shumë mirë se i kujt është automjeti, ia kam marrë automjetin një personi në atë kohë për të bërë një udhëtim dyditor në Selanik. S’kam lidhje fare me personat që përmendni, vetëm një person njoh”, tha ai.
Ai tha se është i gatshëm që të vijë në SPAK, sa herë që të jetë e nevojshme.
“Kurdo që të jetë nevoja. Unë e kam bërë kallëzimin sepse e kam cilësuar një manipulim të të gjitha fakteve dhe një gënjeshtër shumë të madhe”, përfundoi Olsi Rama para gazetarëve.
Pak javë më parë, Bardhi bëri një denoncim publik ku pretendonte se Olsi Rama ishte i përfshirë në organizatën kriminale të Xibrakës, duke i dërguar një letër më pas kreut të SPAK, Altin Dumanit, për të nisur hetime për këtë çështje. Këto akuza, Olsi Rama i quan shpifje, teksa kundërpërgjigjen e ka marrë edhe nga kryeministri Edi Rama, që e ka konsideruar si një gënjeshtër.
