Albania

Olta, na e kurse hipokrizinë të lutem-Nga Ervin Gjonaj

Published

3 years ago

16 January, 2023

albnews

Ministri britanik i Emigracionit, Robert Jenrick në Britani bëri një deklaratë nga ambientet ku kryen procedurat e kthimit të emigrantëve shqiptarë ilegalë ku gjithashtu u shpreh se ‘oficerët po i kërkojnë kudo shqiptarët, do ti gjejnë, do ti kapin dhe me autobusë do ti nisin në aeroport dhe do të ri-atdhesohen’.

Kjo deklaratë e tij ishte postuar në llogarinë e tij në Twitter ku 90% e komenteve ishin në kundërshtim me deklaratën e tij, dënonin gjuhën e tij si dhe akuza të shumta për karrierën politike të tij duke e akuzuar edhe si njeri i korruptuar.

Një ditë me vonë Olta Xhaçka ministrja për Europën (a thua se për kontinentet e tjerë duhen ministra të tjerë) dhe e Punëve të Jashtme të Shqipërisë bëri një deklaratë në profilet e saj në mediat sociale duke e cituar; ‘Tej mase e tronditur kur dëgjoj një Ministër Shteti përgjegjës për emigracionin të përdorë një gjuhë të tillë vetëm për disa vota: Gjeni shqiptarin, ndaloni shqiptarin! Një linçim verbal ndaj një kombi të tërë, në një gjuhë që tingëllon sikur ministri po shpall sezonin e hapur për shqiptarët vetëm disa javë pas Komunikatës së Përbashkët mes Kryeministrit të Republikës së Shqipërisë dhe atij të Britanisë së Madhe , ku vlerësuan rolin e diasporës shqiptare në Britani dhe kontributin e saj të rëndësishëm në kulturë, ekonomi dhe shoqërinë e të dy vendeve. Veçim i turpshëm i një komuniteti nga një ministër me parime demokratike që sjell kujtime të tmerrshme me një brutalitet të padurueshëm!’.

Olta u trondit kur dëgjoi gjuhën e Ministrit Jenrick, por nuk e kam dëgjuar asnjëherë të tronditet për 12 mijë shqiptarë që kaluan kanalin me gomone duke rrezikuar jetën e tyre, nuk u trondit as nga lajmi që një gomone po mbytej dhe në të ishte një shqiptar i konfirmuar, por mund të ketë dhe më shumë, pra as edhe në prag tragjedie Olta nuk u trondit.

Olta u trondit kur dëgjoi gjuhën e ministrit Jenrick kur fliste për të kthyer emigrantët shqiptar mbrapsht. Por Olta duhet të di se Qeveria që ajo bën pjesë ka një marrëveshje për kthimin e emigrantëve shqiptar dhe këtë e ka konfirmuar vetë Kryeministri Rama që kur ishte Boris Johnson ministër i Jashtëm i Britanisë.

Më pas janë zhvilluar takime midis palëve dhe të gjitha marrëveshjet janë firmosur ashtu siç kanë kërkuar Britanikët. Pra asnjëherë pala jonë nuk ka kërkuar legalizimin apo dhënien e një leje qëndrimi të përkohshme për shqiptarët. Dhe marrëveshja është që të kthehen të gjithë, pra ministri Jenrick, po bën atë për të cilën kanë rënë dakord dy qeveritë. Olta tronditet për një gjuhë të tillë që përdor Jenrick për disa vota, por Olta asnjëherë nuk tronditet për gjuhën e Qeverisë së saj për vota.

As nuk tronditet kur mbas votave që fitojnë në bazë të gjuhes vulgare të sapo zgjedhurit shpallen në kërkim nga drejtësia. Olta, si një pjesëtar i komunitetit shqiptar në Britani të lutem na e kurse hipokrizinë, jemi të lodhur nga ju dhe nga politika në tërësi që prodhon Shqipëria. Jemi në 2023 dhe shqiptarët emigrojnë me gomone dhe ilegale, ka nga ata qe kanë lindur në kohën kur janë legalizuar vizat me BE dhe po udhëtojnë me gomone sepse ju si Ministre për Europën nuk denjoni të bëni një marrëveshje me vende të ndryshme si në BE-së po ashtu edhe me Britaninë, që shqiptarët të emigrojnë me viza sezonale, viza pune e të moj kalojnë dete me gomone ku rrezikojnë jetën.

Hipokrizia juaj nuk njeh kufij sepse vetëm firmosni atë qe u kërkon pala tjetër dhe në këtë rast u keni ardhur në ndihmë një Partie në Britani që populli mezi pret ditën e votimeve që ti largoje nga pushteti dhe jeni bërë vegla e tyre për një grusht votash. Postimi i Jenrick është për një grusht votash kurse i juaji është për një grusht ‘Like’ që më së shumti vijnë nga administrata sepse për atë punë i keni punësuar.

Nëse me të vërtet jeni tronditur, atëherë bëni diçka që jo vetëm të mos largohen, por dhe ne që jemi jashtë të kemi mundësinë të kthehemi.

Albania

Gjykata refuzon sekuestrimin e 20 pasurive të Kristjan Boçit dhe Elman Abules

Published

7 hours ago

2 January, 2026

albnews

Gjykata e Tiranës, ka vendosur të mos sekuestrojë rreth 20 pasuri me vlerë gati 50 milion euro, për të cilat policia dhe prokuroria e kryeqytetit, ka pasur indicie të forta se vijnë nga aktiviteti kriminal i personave që i posedojnë ato.

Informacionet e siguruara nga gazetari Elton Qyno, tregojnë se miku i Erjon Veliaj, Elman Abule, që sot në Tiranë konsiderohet biznesmen i sukseshëm, në vitin 2004-2005, ka qënë në Belgjikë një hajdut i dhunshëm, duke përdorur çelësa të kopjuar dhe metodën e thyerjes.

Drejtoria e Interpolit në 12 shtator 2023 është informuar se Elman Abule rezulton i dënuar më datë 17 janar 2007, nga Gjykata e Antvvep, me 30 muaj burg për veprën penale të “Vjedhje me thyerje ose duke përdorur çelësa të kopjuar dhe krijim bande”, duke u dënuar ky shtetas me 2 vjet burg me kusht dhe 1 vit vit në burg për “krijim bande”.

Gjithashtu, rezulton se miku i Abules dhe ish-ortak me subjektin “Rametal” dhe shoqërinë tjetër “Ferro Chrome Holding”, ka qënë Kristian Boçi, i përfshirë në veprimtari të paligjshme dhe i arrestuar në vitin 2011 në Itali, i cili njihet për lidhjet e tij dhe me persona të tjerë të përfshirë në trafikun ndërkombëtar të narkotikëve si Eldi Dizdari.

Gazetari Qyno,ka mësuar se vendimi i mospranimit të kërkesës së prokurorisë, është dhënë pak ditë më parë nga gjyqtari i Tiranës, Altin Abdiu, i cili në fillim të muajit qershor 2025 u rikthye në funksionin e gjyqtarit nga Komisioni i Posaçëm i Apelimit.

Abdiu, refuzoi të sekuestrojë 20 shoqëri tregtare, dyqane, apartamente e vila me vlerë rreth 50 milionë euro, të cilat zotërohen nga Kristian Boçi, Elman Abule, mik i afërt i Erjon Veliaj, Vladimir Avramit si dhe 4 personave të tjerë të lidhur me këta persona.

Ndërkohë pritet që me zbardhjen e vendimit të gjykatës, prokuroria e Tiranës të ushtrojë Apelim në gjykatën e Apelit, duke kërkuar sekuestrimin e këtyre pasurive.

Albania

Stuhia Arktike mbërrin në Evropë: ç’mund të presë Ballkani?

Published

7 hours ago

2 January, 2026

albnews

Pas një periudhe moti më të qëndrueshëm të dominuar nga blloku i fortë Rex, i cili ruajti kushte relativisht të qeta dhe shpesh të buta në pjesën më të madhe të Evropës gjatë periudhës së Krishtlindjeve, rrethanat në atmosferë po ndryshojnë.

Ky sistem me presion të lartë po lëviz ngadalë drejt perëndimit, duke hapur rrugën që masat e ftohta ajrore Arktike të zbresin drejt pjesëve qendrore, lindore dhe jugore të kontinentit, shkruan Severe Weather.

Një rënie e ndjeshme e temperaturave

Ndërsa blloku i Rex-it tërhiqet, po formohet një model i ashtuquajtur dipolar moti, një anticiklon i fortë mbi Atlantikun dhe Evropën Perëndimore, ndërsa një ciklon thellohet mbi pjesët lindore dhe veriore të kontinentit.

Kjo lejon depërtimin e ajrit të akullt nga veriu dhe verilindja, i cili do të sjellë temperatura dukshëm më të ulëta dhe reshje bore të rastit para Vitit të Ri.

Sipas modeleve të parashikimit, masa e ajrit të ftohtë mund të jetë 10-15 °C nën vlerat normale për fundin e dhjetorit dhe fillimin e janarit, gjë që do të rezultonte në një rënie të ndjeshme të temperaturave dhe ngrica në shumë rajone. Lëvizja më e ftohtë e ajrit të ftohtë pritet praktikisht në të gjithë Evropën qendrore dhe lindore, dhe në disa zona temperaturat e mëngjesit mund të bien nën -10 °C.

Ndërsa temperaturat bien, mund të pritet borë në zonat veriore dhe lindore të kontinentit, ndërsa në zonat perëndimore si Mbretëria e Bashkuar dhe Irlanda, ajri i ftohtë do të kontribuojë gjithashtu në formimin e kushteve me borë në ditët e para të vitit 2026.

Rrotullimi i temperaturës

Pas ndërhyrjes fillestare të masës së ftohtë, kushtet atmosferike mund të bëhen përsëri më dinamike. Pritet që në të njëjtën kohë me rrymat më të ftohta veriore, rrjedha e ajrit më e ngrohtë, jugore do të kthehet gradualisht, veçanërisht përgjatë Mesdheut.

Ky kombinim i masave të ndryshme ajrore mund të çojë në modele të papritura të motit – nga ditët e ftohta dhe me borë në rajonet veriore deri te kushtet më të theksuara më të ngrohta dhe më të lagështa drejt jugut dhe jugperëndimit të kontinentit.

Shkurt, ditët e para të vitit 2026 mund të shënojnë fillimin e vërtetë të sezonit të dimrit, me një valë të dallueshme të ftohtë dhe episode bore, por edhe me mundësinë e ndryshimeve më të shpejta të motit ndërsa modelet atmosferike vazhdojnë të zhvillohen.

Ngrohtësia dhe shirat e rrëmbyeshëm po kthehen në Ballkan

Ndërsa perëndimi i Evropës do të ngrijë, situata në zonën tonë do të përmbyset plotësisht. Do të vendoset një rrymë e qëndrueshme jugperëndimore, e cila do të sjellë ajër dukshëm më të ngrohtë dhe më të lagësht nga Mesdheu drejt Evropës qendrore dhe lindore dhe Gadishullit Ballkanik. Kontrasti i temperaturës në të gjithë Evropën do të jetë i madh.

Në Ballkan dhe Evropën Lindore, temperaturat mund të jenë deri në 15 °C më të larta se mesatarja, dhe vlerat ditore do të arrijnë lokalisht 15 °C. Sasia e lartë e lagështisë do të sjellë edhe reshje të dendura shiu, veçanërisht në shpatet jugore të Alpeve dhe shpatet perëndimore të Dinarideve dhe Apenineve, ku gjatë javës mund të bien midis 150 dhe 300 milimetra shi.

Albania

Krijohet kompania shtetërore e transportit/ Balluku emëron administrator këshilltarin e saj

Published

7 hours ago

2 January, 2026

albnews

Ministria e Infrastrukturës regjistroi në Qendrën Kombëtare të Biznesit kompaninë shtetërore, e cila do të ofrojë shërbime të transportit publik. Përmes krijimit të kësaj kompanie, qeveria vendos të hyjë direkt në një sektor të rëndësishëm, i cili deri më sot ka qenë ekskluzivisht domain i kompanive private.

E pagëzuar me emrin Mobal, kompania do të ketë si objekt operimin e shërbimit të transportit publik rrugor të udhëtarëve, përfshirë destinacionet turistike. Paralelisht kompania shtetërore do të ofrojë edhe transportin e nxënësve dhe mësuesve

Por, Mobal nuk do të funksionojë vetëm si ofruese shërbimi, por do të ketë edhe shumë më tepër kompetenca, përfshirë edhe organizimin, licencimin dhe monitorimin e shërbimeve të transportit publik sipas legjislacionit në fuqi. Gjithashtu, do të zhvillojë dhe menaxhojë sisteme digjitale dhe aplikacione për mbikëqyrjen dhe informimin në kohë reale mbi shërbimet e transportit.

Sipas dokumentave të depozituara në QKB administratori i kompanisë është emëruar Henri Telharaj, i cili deri më tani ka mbajtur postin e këshilltarit të Belinda Ballukut. Kompania do të ketë një kapital fillestar prej 10 milionë lekësh, i disbursuar nga fondet e buxhetit të shtetit, ndërkohë që mbetet ende e paqartë se cilat linja do të operojë ajo.