Katër persona janë shpallur në kërkim pas organizmit të dy operacioneve antidrogë në Elbasan. Njoftohet se në kuadër të operacioneve antidrogë “Krasta” dhe “Çereshta”, u proceduan penalisht, për shpërdorim të detyrës, 2 inspektorë pyjesh dhe 1 kryetar fshati.
Gjithashtu në Elbasan, gjatë operacionit “Çereshta”, 2 personave të shpallur në kërkim iu gjetën dhe iu sekuestruan edhe 2 qese me lëndë narkotike cannabis sativa.
Njoftohet se në Skrapar, në kuadër të operacionit policor të koduar “Tomorri”, në një terren të hapur rishtazi, në një zonë të pyllëzuar dhe të thellë malore, në territorin e njësisë administrative Gjerbës, u gjetën të kultivuara në kubikë, në një serë, si dhe u asgjësuan nëpërmjet djegies, 1000 fidanë të dyshuar narkotikë cannabis sativa.
Për rastin, u shpall në kërkim autori i dyshuar i kultivimit të këtyre bimëve narkotike, O. Gj., 39 vjeç, banues në fshatin Bërsak, Skrapar.
Kurse, në kuadër të 2 operacioneve antikanabis të koduara “Krasta” dhe “Çereshta”, u gjetën dhe u asgjësuan nëpërmjet djegies, 252 bimë të dyshuara narkotike cannabis sativa.
Më konkretisht, në një zonë pyjore, në fshatin Seltë, u gjetën dhe u asgjësuan nëpërmjet djegies, 160 bimë të dyshuara narkotike cannabis sativa.
Autori i dyshuar A. D., 53 vjeç, banues në Tiranë, u shpall në kërkim, si dhe nisën hetimet për shpërdorim detyre për Y. Ç., 56 vjeç, F. L., 45 vjeç, me detyrë inspektorë pyjesh në zonat e Gjinarit dhe Zavalinës, dhe K. B., 55 vjeç, kryetari i fshatit Seltë.
Në kuadër të operacionit “Çereshta”, të zhvilluar më 18 qershor 2023, nga Policia e Librazhdit, ditën e djeshme u gjetën dhe u asgjësuan nëpërmjet djegies, 92 bimë të tjera të dyshuara narkotike cannabis sativa.
Në total nga ky operacion janë asgjësuar 672 bimë dhe fidanë narkotikë cannabis sativa. Autorë të kultivimit të këtyre bimëve dhe fidanëve, dyshohet të jenë personat e shpallur në kërkim S. D. dhe K. D.
Në Krujë, në kuadër të operacionit policor të koduar “Territor i pastër”, në një zonë pyjore, në fshatin Cudhi Kamp u gjetën 195 bimë të dyshuara narkotike cannabis sativa.
Në Lezhë, në një zonë pyjore, në fshatin Malecaj, u gjetën, 330 bimë të dyshuara narkotike cannabis sativa.
