Agjencisë Evropiane të Kufirit dhe Rojës Bregdetare ( FRONTEX ) dhe Ministria e Brendshme kanë nënshkruar të hënën Memorandumin e Mirëkuptimit mbi Mekanizmat e Ankesave për veprimet e kryera nga anëtarët e ekipeve të këtij misioni në Shqipëri.
Firmat përkatëse u hodhën nga kreu i FRONTEX, Hans Leijtens dhe Ministri i Brendshëm, Bledi Çuçi, njoftoi ky i fundit në rrjetet sociale.
Zoti Çuçi tha se menaxhimi i kufirit dhe respektimi i të drejtave të njeriut nuk përjashtojnë njëra-tjetrën. “Ne jemi maksimalisht të vendosur të garantojmë respektimin e plotë të të drejtave të njeriut. FRONTEX është një histori suksesi në vendin tonë” tha zoti Çuçi.
Ministri i brendshëm shqiptar u shpreh se Shqipëria si vend tranzit luan një rol të rëndësishëm për t’i prerë rrugën flukseve migratore nga Afrika dhe Lindja e Mesme dhe kontribuon aktivisht në sigurinë e vetë kufijve të BE.
Mekanizmi i Ankesave i agjencisë do të trajtojë ankesat e paraqitura kundër shkeljes së pretenduar të të drejtave themelore të kryera nga anëtarët e ekipeve policore gjatë operacioneve në zonat kufitare për parandalimin e flukseve migratore dhe goditjen e krimit ndërkufitar.
