Prokuroria Speciale e Kosovës ka bërë të ditur se operacioni në veri të Kosovës në bashkëpunim me Policinë, i realizuar në Komunën e Zubin Potokut dhe Zveçanit, ka qenë në kuadër të hetimeve për vrasjen e zyrtarit të EULEX-it, A.S.
Prokuroria po ashtu njofton se operacioni është zhvilluar në bazë të urdhrit të Gjykatës Themelore në Prishtinë, ndërsa është mbështetur nga njësitë relevante të policisë.
Hetuesit nga Drejtoria për Hetimin e Krimit të Organizuar dhe Krimeve të Rënda kanë bastisur dy lokacione në Zveçan dhe shtatë në Zubin Potok, nën dyshimet për kryerjen e veprave penale: rrezikimi i personelit të Kombeve të Bashkuara, vrasje e rëndë dhe sulm ndaj personit zyrtar gjatë kryerjes së detyrës.
Gjatë operacionit janë shoqëruar në Polici shtatë persona, të cilët pasi janë marrë në pyetje janë liruar në procedurë të rregullt.
Nga bastisjet janë sekuestruar prova materiale, përfshirë dy armë, municion, veshje me përmbajtje nacionaliste, dylbi, dokumente dhe pajisje elektronike të ndryshme.
Ky operacion duket se lidhet me vrasjen e zyrtarit doganor lituanez të EULEX-it, Audrius Šenavičius (me inicialet A.S.), i cili u qëllua më 19 shtator 2013 në fshatin Ballaban të Zveçanit dhe ndërroi jetë gjatë trajtimit mjekësor në spital.
Rasti ka mbetur i pazgjidhur për më shumë se një dekadë, me EULEX-in që ka ofruar shpërblime të larta – së fundmi 82,000 euro në 12-vjetorin e ngjarjes – për çdo informacion që çon në identifikimin dhe arrestimin e autorëve.
