Nga Ervin Gjonaj
Diaspora voton! Dhe kjo është e drejtë dhe e domosdoshme. Por ajo që po ndodh sot nuk është thjesht pjesëmarrje politike, por shndërrimi i Diasporës në një arenë militantizmi partiak të stilit shqiptar.
Siç ndodh zakonisht në Shqipëri, ku fushatat zgjedhore fillojnë muaj përpara zgjedhjeve, kësaj here fushata po zhvillohet edhe jashtë kufijve. Kryeministri e nisi me takime në Nju Jork, Athinë e Londër. Më pas iu bashkua edhe lideri i opozitës, fillimisht me takime online e më pas me praninë e tij fizike. Në vazhdim, edhe partitë e tjera ndjekën të njëjtën rrugë, ndonëse me një intensitet më të ulët se dy forcat kryesore politike.
Retorika e këtyre takimeve nuk sjell asgjë të re. Ato mbushen me slogane boshe kundër kundërshtarit, folklorizma dhe atdhedashuri të romantizuar, ndonjëherë të shoqëruara me incidente të stilit “miting-prishës”. Sa më i madh mitingu, aq më e theksuar është retorika e përplasjes politike. Partia Socialiste sulmon opozitën, ndërsa opozita shpalos keqqeverisjen e PS-së, ndonëse vetë ofron pothuajse të njëjtën “pamje” qeverisëse, me të njëjtët individë që dorëzuan pushtetin në 2013.
Një garë e ethshme po zhvillohet mes partive për të grumbulluar militantë në Diasporë, pa u shqetësuar aspak sesi miliona shqiptarë u detyruan të emigrojnë. Askush nuk merr përgjegjësi për emigrimin masiv, por të gjithë shfaqin interes vetëm për një grusht votash.
Historia na tregon se Diaspora shqiptare ka pasur një rol të jashtëzakonshëm në formimin e shtetit shqiptar, veçanërisht gjatë periudhës së Rilindjes Kombëtare. Me ardhjen e komunizmit, ajo u nda në “Çlirimtarë” dhe “Tradhtarë”. Duket se kjo ndasi po vazhdon edhe sot: kush mbështet një parti është “në të drejtë”, kush është kundër, është “armiku”.
Diaspora duhet të reflektojë. Ose partitë duhet të ndalojnë fushatat e tyre jashtë vendit, ose vetë Diaspora duhet të dalë nga ky kurth militantizmi që nuk i shërben askujt, përveç interesave afatshkurtra partiake. Ajo duhet të shohë përtej retorikës boshe dhe të kërkojë llogari për të ardhmen e saj dhe të Shqipërisë.
