Deputetët e Lidhjes Demokratike të Kosovës dhe të Lëvizjes Vetëvendosje e lëshuan sot sallën e Kuvendit të Kosovës ku po diskutohej për krijimin e komisionit për themelimin e tribunalit ndërkombëtar për krimet që Serbia i ka kryer gjatë luftës në Kosovë.
Deputetët e dy partive politike opozitare thanë se kjo është “një tallje me qytetarët, pasi që një tribunal i tillë mund të krijohet vetëm nga Kombet e Bashkuara”.
Kryetari i Kuvendit të Kosovës, Kadri Veseli, u bëri thirrje deputetëve të opozitës që t’i lënë anash inatet politike dhe ta mbështesin iniciativën për formimin e, siç tha, tribunalit për gjenocidin dhe krimet serbe në Kosovë. Ka reaguar edhe Shefi i Grupit Parlamentar të Aleancës për Ardhmërinë e Kosovës të kryeministrit Ramush Haradinaj, duke e vlerësuar si të pakutimtë veprimin e opozitës.
Kuvendi i Kosovës, në mesin e muajit prill, ka formuar një komision të veçantë ‘ad hoc’ për dënimin e, siç është thënë, krimeve të luftës, gjenocidit dhe agresionit të regjimit të Serbisë.
Ndërkohë, qindra qytetarë protestuan në mbështetje të viktimave të dhunës seksuale gjatë luftës së fundit në Kosovë. Me moton “Më trajto dinjitetshëm”, organizatorët e kësaj proteste kërkuan që të zbardhet e vërteta e fotografisë të publikuar nga deputetja Flora Brovina. Sipas të dhënave rreth 20 mijë gra e burra janë viktima të dhunës seksuale gjatë luftës në Kosovë.
