Partia Demokratike njofton se në emër të koalicionit opozitar ka kërkuar nga Komisioni Qendror i Zgjedhje që t’i vërë në dispozicion materialet zgjedhore të votimeve të 30 qershorit.
Synimi i opozitës është që përmes këtyre materialeve të dëshmojë përpara publikut manipulimet e mëdha që, sipas saj, janë kryer më 30 qershor.
“Partitë e opozitës kanë kërkuar vënien në dispozicion të materialeve zgjedhore duke iu referuar Kodit të Procedurës Administrative dhe Ligjit për të Drejtën e Informimit. Materialet zgjedhore nuk klasifikohen si sekret dhe, sipas ligjit, ato duhet të vihen në dispozicion brenda 10 ditësh”, thuhet në njoftimin e PD-së.
Kërkesa është firmosur nga Gazment Bardhi, Sekretar i Përgjithshëm i PD-së, dhe ajo përfshin 8 elementë:
- Kopje të printuara të listave zgjedhore për çdo qendër votimi.
- Kopje e vërtetuar e Tabelës Përmbledhëse të rezultatit për zonën zgjedhore nga KQZ-ja.
- Kopje të vërtetuara të Tabelave Përmbledhëse të rezultateve zgjedhore për çdo njësi të qeverisjes vendore nga KZAZ-ja.
- Kopje të vërtetuara të tabelave të rezultateve për çdo qendër votimi nga grupet e numërimit.
- Kopje të vërtetuara të procesverbaleve tip për mbylljen e votimit për qendër votimi.
- Kopje të vërtetuara të listës së anëtarëve të administratës zgjedhore, të emëruar kryesisht nga KQZ dhe KZAZ përkatëse, duke specifikuar për secilin administratën zgjedhore në të cilën ai bën pjesë, sipas regjistrit të administrimit zgjedhor që mban KQZ-ja, për çdo qendër votimi, KZAZ dhe Grup Numërimi.
- Kopje të regjistrimit të kamerave të të gjitha tavolinave të numërimit në çdo Grup të Numërimit të Votave.
- Kopje të regjistrimit të kamerave të ambienteve të brendshme të KZAZ-ve.
PD sqaron se për këtë kërkesë është vënë në dijeni dhe shefja e këtij Misioni të ODIHR, Audrey Glover./TCH/
