Opozita në Shqipëri kërkoi dorëheqjen e kryeministrit Edi Rama pas dështimit të hapjes së negociatave. Kreu I opozitës Lulzim Basha tha se Shqipëria duhet të njekë shembullin e Maqedonisë së Veriut, të shkojë në zgjedhje të parakohshme dhe të ketë një qeveri të re, që do të vazhdojë negociatat me BE-në.
“Është koha qe qeveria te ndjekë shembullin e Maqedonisë së Veriut, të marrë përgjegjësitë për dështimet e saj dhe t’ia kthejë mandatin popullit shqiptar. Me një qeveri të re, legjitime që drejton procesin e negociatave, përparimi është i mundur. Na duhet një qeveri e re që të vazhdojë negociatat me BE-në, një qeveri e dalë nga zgjedhje të lira dhe të ndershme”, deklaroi Lulzim Basha, kryetar i PD-së.
Ndërkohë kryeministri Rama i ka hedhur poshtë të gjitha mundësitë për zgjedhje dhe se nuk do ta ndjekë shembullin e Shkupit, por do të punojë në drejtim të reformave.
“Këtu nuk ka asgjë të re. Ata kanë punuar shumë fort dhe nuk kanë lënë gur pa lëvizur për të dështuar procesin. Nuk ja kanë dalë. Qoftë Maqedonia e Veriut, qoftë Shqipëria nuk kanë arritur të marrin atë që ju takonte si rezultat i një përplasje të brendshme në tryezën e familjes evropiane. Siç e shikoni dielli ka dalë përsëri, dita ka filluar përsëri dhe rruga jonë vazhdon pa asnjë lëkundje dhe ekuivok. Duam të bëjmë Shqipërinë evropiane për shqiptarët, për fëmijët tanë dhe këtë do të bëjmë çdo ditë”, tha Edi Rama, kryeministër i Shqipërisë.
Opozita në Shqipëri po kërkon me çdo kusht zgjedhje të parakohshme pas mos marrjes së datës për fillimin e negociatave me BE-në. Sipas opozitës BE nuk e ka bllokuar Shqipërinë por e ka bllokuar vetëm kryeministrin Edi Rama, të cilin e ka akuzuar se po e mban peng vendin.
