Boksieri kuban i kategorisë së rëndë Luis Ortiz ka arritur t’i përballojë dy nokdaune duke e mposhtur me nokaut teknik në raundin e gjashtë amerikanin Charles Martin.
Për Ortizin 42-vjeçar ishte lufta e parë që nga nëntori i vitit 2020. Martin e rrëzoi Ortizin një herë në raund të dytë dhe një herë në raund të katërt. Ai ishte duke kryesuar me pikë, por në raundin e gjashtë Ortiz arriti të rikthehet duke e rrëzuar dy herë Martinin e duke triumfuar me nokaut teknik.
Për Ortizin është fitorja e 33-të në boksin profesionist (28 KO) karshi dy humbjeve. Dy humbjet i pësoi nga amerikani Deontay Wilder në luftë për titull bote.
Ortiz me fitoren e shënuar ka bërë hap para drejt një lufte tjetër për titull bote.
Në parameç boksoi edhe ylli tjetër kuban i kategorisë së rëndë Frank Sanchez. Ai mposhti me vendim unanim pas 10 raundeve Christian Hammerin.
Mbrëmja e boksit u mbajt të shtunën mbrëma në Hollywood, Florida.
